Shimoliy Koreya NATO sammitini qoralab, yadrosizlanish AQSH ittifoqchilaridan boshlanishi kerakligini bildirdi

Shimoliy Koreya bugun, 11 iyul kuni AQSH va uning ittifoqchilarini NATO sammitidan keyin harbiy bloklarni mustahkamlash va qurollanish poygasini tezlashtirayotganlikda aybladi. Bu haqda mamlakat Tashqi ishlar vazirligining davlat milliy axborot agentligi orqali tarqatgan bayonotida aytildi.

Vazirlikka ko‘ra, NATO harbiy xarajatlarni oshirish va Osiyo–Tinch okeani mintaqasidagi ittifoqchilari bilan harbiy hamkorlikni kengaytirish orqali bloklar o‘rtasidagi qarama-qarshilikka sodiqligini yanada kuchaytirgan.

Eslatib o‘tamiz, 7 iyul kuni Turkiyada bo‘lib o‘tgan NATO sammitida Yevropa ittifoqchilari AQSH Prezidenti Donald Trampning alyans mudofaa xarajatlarida ko‘proq mas’uliyatni o‘z zimmasiga olish haqidagi bosimi fonida 50 milliard AQSH dollaridan ortiq qiymatga ega harbiy xaridlar va sanoat kelishuvlarini e’lon qilgan edi.

Sammit doirasida Shimoliy Koreyaning raqibi bo‘lgan Janubiy Koreya Prezidenti Li Je Myon Seul NATO davlatlari bilan ilmiy tadqiqotlar, ilg‘or texnologiyalar hamda qurol-yarog‘ tizimlarini ishlab chiqarish sohalarida hamkorlikni kengaytirishga umid bildirgan.

Shimoliy Koreya esa sammit NATOning urush va qarama-qarshilikka yo‘naltirilgan tuzilma ekanini yana bir bor ko‘rsatganini ta’kidladi. Pxenyan fikricha, alyans Yevropa hamda Osiyo–Tinch okeani mintaqasidagi tinchlik va xavfsizlik hisobiga o‘zining eksklyuziv geosiyosiy manfaatlarini ilgari surmoqda.

Shuningdek, Pxenyan NATO rahbarlarini Shimoliy Koreyaning qonuniy suveren huquqlarini amalga oshirishini tahdid sifatida ko‘rsatayotganlikda ayblagan. 

G‘arbning Shimoliy Koreyani yadro qurolidan voz kechishga chaqirishlari endi qaytarib bo‘lmaydigan tarzda barham topganini ta’kidlagan Pxenyan yadrosizlantirish harakatlari, avvalo, AQSH himoyasi ostida o‘z yadro dasturlarini rivojlantirishga intilayotgan Janubiy Koreya va Yaponiyaga, shuningdek, NATOning yadroviy qurollarni birgalikda joylashtirish dasturida ishtirok etayotgan a’zo davlatlarga qaratilgan bo‘lishi kerakligini bildirgan.

Vazirlik Shimoliy Koreya o‘zining suvereniteti, xavfsizlik manfaatlari hamda mintaqaviy tinchlikni suveren huquqlaridan mas’uliyatli foydalanish orqali himoya qilishda davom etishini ta’kidlagan.