Shahobiddin Zoirov Dubayda kamar uchun jang qiladi

O‘zbekistonlik professional bokschi, Rio-2016 Olimpiadasi g‘olibi Shahobiddin Zoirov shu yilning 6 dekabr kunida Birlashgan Arab Amirliklarining Dubay shahrida joylashgan “The Agenda” majmuasida boks bo‘yicha “IBA Chempionlar oqshomi” musobaqasida ringga ko‘tariladi. Bu haqda O‘zbekiston Professional boks federatsiyasi matbuot xizmati xabar berdi.

O‘sha kuni 31 yoshli Shahobiddin Zoirov Venesuela vakili Yoel Finol bilan jang qiladi. Eng yengil vazn toifasida tashkil etiladigan jang IBA Pro tasnifidagi chempionlik kamari uchun o‘tkaziladi.

Qayd etish joiz, Zoirov so‘nggi jangini oktyabr oyida aynan IBA Pro tasnifidagi musobaqa doirasida ispaniyalik Samuel Karmonaga qarshi o‘tkazib, g‘alaba qozongan edi. Karmonani Zoirovdan avval Toshkentdagi turnirda Hasanboy Do‘smatov ham mag‘lub etgandi.

Ma’lumot uchun, Zoirov profboksda jami 6 ta jang o‘tkazib, barchasida g‘alaba qozongan. Janglarining 3 tasida raqiblarini nokautga uchratgan.