Sentyabrdan o‘zbekistonliklar Qirg‘izistonga kirishi mumkin bo‘ldi

Joriy yilning 1 sentyabrdan boshlab O‘zbekiston fuqarolari Qirg‘izistonga hududiga turli cheklovlarsiz kirishi mumkin bo‘ladi.

Qirg‘iziston Sog‘liqni saqlash vazirligi ma’lumotiga ko‘ra, O‘zbekiston COVID-19 bilan bog‘liq sanitariya-epidemiologik vaziyat barqaror bo‘lgan mamlakatlar ro‘yxatiga kiritiladi.

“Qirg‘iziston Respublikasi Tashqi ishlar vazirligining O‘zbekistonda COVID-19 koronavirus infeksiyasi bilan bog‘liq epidemiologik vaziyatning o‘zgarishi to‘g‘risidagi Axborot xatiga muvofiq, 2020 yil 1 sentyabrdan boshlab O‘zbekiston Respublikasi koronavirus infeksiyasining pasayishi va epidemiologik vaziyatning barqarorlashuvi kuzatilgan xorijiy mamlakatlar ro‘yxatiga 32-o‘rinda kiritiladi”, deyiladi qo‘shni mamlakat Sog‘liqni saqlash vazirligi xabarida.

Ma’lumot uchun, 30 avgust soat 10:00 holatiga O‘zbekistonda koronavirus infeksiyasi qayd etilganlar soni 41303 nafarni tashkil qilmoqda. Ularning 38 359 nafari sog‘aygan va 311 nafari vafot etgan.