Sherzod Asadov Samarqand sammitining eng muhim natijasi nima bo‘lishini aytdi

O‘zbekiston Prezidentining matbuot kotibi Sherzod Asadov Samarqand shahrida o‘tayotgan “Markaziy Osiyo – Yevropa Ittifoqi” sammiti tadbirlari to‘g‘risida axborot berdi.

Uning ma’lum qilishicha, barcha ishtirokchi delegatsiyalar Samarqandga yig‘ilgan. Yevropa Kengashi va Yevropa Komissiyasi prezidentlari, shuningdek, Markaziy Osiyoning beshta respublikasi Prezidentlari shular jumlasidan.

“Davlatimiz rahbari Yevropa Ittifoqi yetakchilar Antoniu Koshta va Ursula fon der Lyayen xonim bilan alohida uchrashuvlar, keyin qo‘shma tarkibda muzokaralar o‘tkazdi. O‘zbekiston bilan YeI o‘rtasidagi ko‘p qirrali hamkorlikni, eng avvalo savdo, iqtisodiyot va investitsiya sohalarida yanada rivojlantirish va mustahkamlash masalalari atroflicha ko‘rib chiqildi.

YeIning bosh institutlari rahbarlari Yangi O‘zbekistonni barpo etish bo‘yicha amalga oshirilayotgan iqtisodiy islohotlar dasturini, shuningdek, Markaziy Osiyoda yaxshi qo‘shnichilik, ishonch va sheriklikni mustahkamlash borasidagi siyosatini yuksak baholadilar va qat’iy qo‘llab-quvvatlashlarini bildirdilar”, dedi Prezident matbuot kotibi.

Asadovga ko‘ra, tomonlar innovatsiyalar, yashil energetika, tog‘-kon tarmog‘i, qishloq xo‘jaligi, transport, logistika, raqamlashtirish va boshqa yo‘nalishlarda qo‘shma dastur va kooperatsiya loyihalarini ilgari surishga kelishib olgan. O‘rtada mustahkamlanib borayotgan do‘stlik va ko‘p qirrali sheriklikning ramzi sifatida Prezident Mirziyoyev va Yevropa Ittifoqi yetakchilari daraxt ekkan.

Asadovning aytishicha, sammitning ishbilarmonlik dasturi ham bor: uning doirasida Shavkat Mirziyoyev Yevropa Tiklanish va taraqqiyot banki prezidenti Odil Reno-Basso bilan uchrashgan. Shuningdek, Yevropa Investitsiya bankining mintaqaviy ofisini ta’sis etish to‘g‘risida bitim imzolandi.

Sammitning asosiy tadbirlari ertaga bo‘lib o‘tadi.

 “Yakunda sammitning eng muhim natijasi – Markaziy Osiyo va Yevropa Ittifoqi o‘rtasida konstruktiv muloqotni kengaytirishga, barcha yo‘nalishlardagi hamkorlikka kuchli sur’at bag‘ishlab, munosabatlarni strategik sheriklik darajasiga olib chiqadigan Samarqand deklaratsiyasi imzolanishi kutilmoqda”, dedi Asadov.

Shundan keyin delegatsiyalar rahbarlari Samarqand iqlim forumining yalpi sessiyasida ishtirok etadi. Asosiy e’tibor ekologik tahdidlarga qarshi kurashish, bu boradagi xalqaro hamkorlikni mustahkamlashga qaratiladi.

Eslatib o‘tamiz, O‘zbekiston Respublikasi Prezidenti Shavkat Mirziyoyev bugun, 3 aprel kuni “Markaziy Osiyo – Yevropa Ittifoqi” birinchi sammitida ishtirok etish uchun Samarqand shahriga kelgan Markaziy Osiyo davlatlari yetakchilari bilan uchrashuvlar o‘tkazgandi.