Rossiya ikki okean va uchta dengizda harbiy mashg‘ulotlar boshladi

Rossiya Shimoliy muz va Tinch okeanlari, shuningdek, O‘rtayer dengizi, Kaspiy va Boltiq dengizlarida bir qator harbiy mashg‘ulotlar o‘tkazishni boshladi. Mashg‘ulot manyovrlarida 90 mingdan ortiq kishi ishtirok etmoqda. Bu haqda Rossiya Mudofaa vazirligi xabar berdi.

Shuningdek, mashg‘ulotlarda 400 dan ortiq harbiy kemalar, suv osti kemalari va flotni qo‘llab-quvvatlovchi yordamchi kemalar, Harbiy-dengiz va Aerokosmik kuchlarning 120 dan ortiq samolyot va vertolyotlari, 7 mingga yaqin qurol-yarog‘lar, harbiy va maxsus texnika ishtirok etadi. Mashqlar 16 sentyabrgacha davom etadi.

“Birinchi bosqichda belgilangan jangovar tayyorgarlik hududlarida kuch guruhlarini joylashtirishni ishlab chiqish rejalashtirilgan. Keyinchalik, shartli dushmanning strategik muhim ob’ektlari va kuchlarini yo‘q qilish, jihozlanmagan qirg‘oqqa amfibiya hujum kuchlarini tushirish, dengiz xo‘jaligi ob’ektlari va strategik aloqalarni himoya qilish uchun jangovar harakatlarga qur’a tashlanadi", deyiladi xabarda.

Qayd etilishicha, mashg‘ulotlarga Ichki ishlar vazirligi, Favqulodda vaziyatlar vazirligi, Milliy gvardiya va Federal xavfsizlik xizmatining tezkor guruhlari, shuningdek, Rossiya Federatsiyasining hamkor davlatlari harbiy xizmatchilari ham jalb qilingan.

Xitoy Mudofaa vazirligi xitoylik harbiy xizmatchilar ham Rossiyaning “Okean-2024” strategik mashg‘ulotlarida ishtirok etishini ma’lum qilgan. Bundan tashqari, Pekin ikki mamlakat Qurolli kuchlari o‘rtasidagi strategik hamkorlikni chuqurlashtirish maqsadida shu oyda o‘tkaziladigan “Shimol-Qo‘shma 2024” rus-xitoy qo‘shma mashg‘ulotlarini e’lon qildi. Mashqlar Yapon dengizi va Oxotskda bo‘lib o‘tadi.

Ma’lumot uchun, iyul oyining oxiri va avgust oyining boshida Rossiya Arktika, Boltiq va Kaspiy dengizlari va Tinch okeanida 300 ga yaqin kemalar, qayiqlar, suv osti kemalari va yordamchi kemalar, 50 tagacha samolyotlar, 200 dan ortiq harbiy va maxsus texnika, shuningdek, 20 mingdan ortiq harbiy va fuqarolik xodimlari bilan mashg‘ulot olib borgan. Rossiyaning Ukrainaga qarshi urushida qatnashgan va so‘nggi ikki yil ichida katta yo‘qotishlarga uchragan Rossiya Qora dengiz floti unda ishtirok etmagan.

Eslatib o‘tamiz, avvalroq neytral maqomga ega Shveysariya NATO a’zosi Fransiya bilan harbiy mashg‘ulotlarni o‘tkazishi xabar qilingan edi.