Ronaldu yangi rekord o‘rnatdi

Kecha, 14 oktyabr kuni jahon chempionati saralash doirasida Portugaliya Vengriya terma jamoalari uchrashuvi bo‘lib o‘tdi. Portugaliyalik futbol yulduzi Krishtianu Ronaldu uchrashuvda dubl qayt etib, Jahon chempionati saralash bosqichida gol urish bo‘yicha yangi rekord o‘rnatdi. Bu haqda “Associated Press” xabar berdi.

Uchrashuv boshida Attila Salai mehmonlar darvozasini ishg‘ol qilib, Vengriyani oldinga olib chiqdi. Shundan so‘ng, Ronalduning birinchi bo‘limdagi dubli portugaliyaliklarga ustunlikni qaytarib berdi. 40 yoshli hujumchi Nelson Semedu uzatmasidan so‘ng to‘pni darvozaga joylashtirdi. Bu uning Jahon chempionati saralashlaridagi 40-goli bo‘lib, u gvatemalalik Karlos Ruisning 39 ta gollik natijasini ortda qoldirib, yangi rekord o‘rnatdi.

Tanaffus arafasida Ronaldu o‘zining xalqaro miqyosdagi 143-golini urdi va Portugaliyaga 2:1 hisobida ustunlik keltirdi. Biroq uchrashuv yakuniga yaqin Vengriya yana hujumlarni kuchaytirdi va Dominik Soboslai qo‘shimcha daqiqalarda hisobni tenglashtirdi.

Mazkur durangdan so‘ng Roberto Martines shogirdlari “F” guruhida 10 ochko bilan birinchi o‘rinni saqlab qolgan bo‘lsa-da, ular Vengriyadan atigi 5 ochko oldinda bormoqda. Bu esa Portugaliya terma jamoasi uchun JCH–2026 yo‘llanmasini rasmiylashtirishni masalasini navbatdagi turlarga kechiktiradi.

Shunga qaramay, Ronalduning o‘yinidagi rekordlar futbol tarixiga yana bir muhim sahifa qo‘shdi. U endi Jahon chempionati saralash bosqichlarining eng sermahsul to‘purariga aylandi.