“Real” Kroos, Modrich va Vaskes borasida hamon bir qarorga kelgani yo‘q

Keyingi hafta Luka Modrich, Toni Kroos va Lukas Vaskes uchun muhim bo‘ladi. Bu haqda insayder Fabritsio Romano ma’lum qildi.

Toni Kroos va Luka Modrichning shartnomalari, avvalgi muzokaralar va mart oyidagi rejalarga qaramay, hali ham uzaytirilmagan. Bundan tashqari, “qaymoqranglilar” Lukas Vaskes bilan shartnomani uzaytirish bo‘yicha muzokaralarning yakuniy bosqichiga kirmoqchi. Shuningdek, “Real Madrid” uchun muhim mavzu – Andrey Lunin bilan shartnomani uzaytirish masalasi hal qilinishi kutilmoqda.

Qayd etish joiz, “Real” sardori Nacho Fernandes joriy mavsum yakunida klubni tark etishga qaror qildi. Himoyachi jamoa bilan shartnomasini uzaytirishdan bosh tortdi. U “qirollik klubi” bilan 23 yillik hamkorligini to‘xtatishga tayyorligini bildirdi.

12 may kuni Madridda mahalliy “Real”ning joriy mavsum La Ligadagi g‘alabasiga bag‘ishlangan chempionlik paradi bo‘lib o‘tdi. Tadbir qahramonlari – “qaymoqranglilar” futbolchilari va murabbiylar shtabi usti ochiq avtobusda Ispaniya poytaxti bo‘ylab chempionlikni tantana qildi.