“Реал” Кроос, Модрич ва Васкес борасида ҳамон бир қарорга келгани йўқ

Кейинги ҳафта Лука Модрич, Тони Кроос ва Лукас Васкес учун муҳим бўлади. Бу ҳақда инсайдер Фабрицио Романо маълум қилди.

Тони Кроос ва Лука Модричнинг шартномалари, аввалги музокаралар ва март ойидаги режаларга қарамай, ҳали ҳам узайтирилмаган. Бундан ташқари, “қаймоқранглилар” Лукас Васкес билан шартномани узайтириш бўйича музокараларнинг якуний босқичига кирмоқчи. Шунингдек, “Реал Мадрид” учун муҳим мавзу – Андрей Лунин билан шартномани узайтириш масаласи ҳал қилиниши кутилмоқда.

Қайд этиш жоиз, “Реал” сардори Начо Фернандес жорий мавсум якунида клубни тарк этишга қарор қилди. Ҳимоячи жамоа билан шартномасини узайтиришдан бош тортди. У “қироллик клуби” билан 23 йиллик ҳамкорлигини тўхтатишга тайёрлигини билдирди.

12 май куни Мадридда маҳаллий “Реал”нинг жорий мавсум Ла Лигадаги ғалабасига бағишланган чемпионлик паради бўлиб ўтди. Тадбир қаҳрамонлари – “қаймоқранглилар” футболчилари ва мураббийлар штаби усти очиқ автобусда Испания пойтахти бўйлаб чемпионликни тантана қилди.