“Ratatuy” multfilmi mualliflaridan biri 25 yilga qamaldi

Disney va Pixar filmlari ustida ishlagan, xususan, “Ratatuy” multfilmi animatori, rassom Bolxem Bushiba pedofiliya, zo‘rlash va odam savdosida ayblanib, 25 yillik qamoq jazosiga hukm qilindi. Bu haqda “Le Figaro” xabar berdi.

Nashrning yozishicha, animator bolalarga nisbatan shahvoniy va jismoniy zo‘ravonlikning mingdan ortiq harakatlarini jonli efirga uzatish uchun buyurtma berishda ayblangan. Jinoyatlar 2012 yildan 2021 yilgacha, Bushiba Fransiya va AQSH g‘arbida yashagan paytda sodir bo‘lgan.

Zo‘ravonliklar Filippinda sodir bo‘lgan. Bushiba qizlarni zo‘rlash yoki qiynoqqa solish uchun ularning kambag‘al onalari, qarindoshlari yoki qo‘shnilariga pul to‘lagan. Erkak bu translyatsiyalarni darknet orqali tashkil qilib, o‘z qurilmalarida tomosha qilgan. Qurbonlarning yoshi uch yoshdan 15 yoshgacha bo‘lgan.

Yevropa Ittifoqi politsiyasi Yevropol 2021 yilda bolalarni jinsiy ekspluatatsiya qilish uchun to‘lov sxemasini tashkil qilgan Filippin fuqarosini fosh qilgan paytda Bushibani payqab qolgan va hibsga olgan. 

Prokurorlarning hisob-kitoblariga ko‘ra, to‘qqiz yil davomida Bushiba minglab jinsiy zo‘ravonlik harakatlarini tomosha qilish uchun 50 000 dollardan ko‘proq pul sarflagan.

Ma’lumot uchun, Bolxem Bushiba 59 yoshda bo‘lib, ikki nafar o‘g‘li bor. U “Ratatuy”, “Yuqoriga” va “Ajabtovur oila” kabi multfilmlarni yaratishda ishtirok etgan. Animator 2014 yilda ilk bor sakkiz yoshli qizga jinsiy zo‘ravonlik qilishda aybdor deb topilgan, ammo u atigi ikki yillik sinov muddatiga hukm qilingan.

Eslatib o‘tamiz, avvalroq musiqa prodyuseri va reper Shon Kombsga “yirik jinoiy korxona” tashkil etish, odam savdosi va boshqa bir qator jinoyatlarda ayblov qo‘yilgandi. Joriy yil 2 oktyabr kuni 120 kishi reper ustidan sudga da’vo arizasi berishni rejalashtirayotgani ma’lum bo‘lgan. Ular jinsiy zo‘ravonlik va ekspluatatsiya qilinganini da’vo qilmoqda va da’vogarlarning 25 nafari o‘sha paytda voyaga etmagan bo‘lgan. P.Diddi esa o‘z aybini rad etib kelmoqda.