Ramzan Qodirov jiyanini o‘ziga maslahatchi qilib oldi

Checheniston rahbari Ramzan Qodirov 26 yoshli jiyani Hamzat Qodirovni o‘ziga kuch bloki bo‘yicha maslahatchi-yordamchi etib tayinladi. Bu haqda Checheniston Milliy siyosat, tashqi aloqalar, matbuot va axborot bo‘yicha vaziri Axmed Dudayev ma’lum qildi.

Dudayevning so‘zlariga ko‘ra, Hamzat Qodirovga ishonib topshirilgan har qanday yo‘nalish “dinamik rivojlana boshlaydi”. Shuningdek, Dudayev Hamzatni Ramzan Qodirovning “sodiq ittifoqchisi” deb atagan.

Ta’kidlash joizki, joriy yilning fevral oyi boshida Qodirovning jiyani respublika Mulk va yer munosabatlari vaziri, Bosh vazir o‘rinbosari lavozimiga tayinlangan. Bundan uch yil oldin esa, o‘sha paytda 23 yoshda bo‘lgan Hamzat Qodirov Checheniston Sport vazirligini boshqargan. 

“Istalgan muassasa va har qanday lavozimdagi qarindoshlarimga qo‘yilgan talab o‘n baravar ko‘p, chunki ular men tufayli emas, balki o‘zlarining iqtidori ortidan ishlayotganini isbotlashi kerak. Men kimga ishonsam, o‘shani  tayinlayman”, degan Ramzan Qodirov qarindoshlarining Checheniston hukumatiga tayinlanishiga izoh berar ekan.

Ayrim nashrlarning ma’lumotlariga ko‘ra, Chechenistondagi 158 nafar yuqori martabali amaldorning 30 foizi Ramzan Qodirovning qarindoshlari, 23 foizi qishloqdoshlari, yana 12 foizi Checheniston rahbarining do‘stlari va ularning qarindoshlaridir. 

Eslatib o‘tamiz, oldinroq Razman Qodirovning 20 yoshli qizi, Qodirov kotibiyati rahbarining o‘rinbosari Xutmat Qodirova respublika sog‘liqni saqlash tizimini boshqarishi aytilgandi.