Ramzan Qodirov Nursulton Ro‘ziboyevga avtomobil sovg‘a qildi (video)

Checheniston rahbari Ramzan Qodirov o‘zbekistonlik UFC jangchisi Nursulton Ro‘ziboyevga Jetour avtomobilini sovg‘a qildi. Bu haqda sportchining o‘zi ma’lum qildi.

Ramzan Qodirov sportchini UFC'dagi debyut jangida yorqin g‘alabaga erishgani bilan tabriklab, unga avtomobil sovg‘a qilgan. Ro‘ziboyev esa Checheniston rahbariga videomurojaat yo‘llab, sovg‘a uchun minnatdorlik bildirgan.

Ma’lumot uchun, yarim o‘rta vazn toifasidagi Ro‘ziboyev joriy yilning 2 iyul kuni UFC Vegas 76 turniri doirasida braziliyalik Bruno Ferreyraga qarshi oktagonga ko‘tarildi. 5 daqiqadan 3 raundga mo‘ljallangan jang bor-yo‘g‘i 1 daqiqa 20 soniya davom etdi. Bunga qadar 10 ta jang o‘tkazib, barchasida muddatidan oldin g‘alabaga erishgan braziliyalik Bruno Ferreyra Nursulton Ro‘ziboyevga mag‘lub bo‘ldi.

Bu orqali Nursulton ham jangda, ham turnirning “Kecha chiqishi” nominatsiyasida g‘oliblikni qo‘lga kiritdi va tashkilot tomonidan kafolatlangan gonorardan tashqari UFC'ning maxsus 50 ming dollarlik bonusiga ham ega chiqdi. Bundan tashqari, u birinchi jangning o‘zidanoq tashkilot reytingida 108 pog‘ona yuqorilab, 29-o‘ringa joylashdi.

Ro‘ziboyevning chiroyli debyuti haqida sport jamoatchiligi iliq fikrlarni bildirib o‘tdi. Jumladan, eng yengil vazn toifasida UFC chempioni Aljameyn Sterling u navbatdagi shov-shuvli jangchi bo‘lishi mumkinligini aytdi. Sportchi AQSHdan qaytib kelganidan so‘ng esa Andijon viloyati hokimi Shuhrat Abdurahmonov unga 3 xonali uy sovg‘a qildi.

Eslatib o‘tamiz, Ro‘ziboyevning keyingi jangi sanasi va raqibi ham allaqachon ma’lum bo‘lgan. Unga ko‘ra, o‘zbekistonlik UFC jangchisi joriy yilning 4 noyabr kuni Braziliyaning San-Paulo shahrida joylashgan “Ibirapuera Gymnasium” majmuasida navbatdagi UFC Fight Night musobaqasida oktagonga ko‘tariladi. O‘sha kuni unga mahalliy sportchi Kayo Borralo raqiblik qiladi. Mazkur jang orqali Nursulton boshqa bir o‘zbekistonlik jangchi Mahmud Murodov uchun revansh olish imkoniyatiga ega bo‘ladi.