Putin Rossiya jang maydonida g‘alaba qozonayotganini aytdi

Rossiya Prezidenti Vladimir Putin Rossiya Ukrainadagi urushda jang maydonida ustunlikka erishayotganini ta’kidlab, Ukraina rahbariyatini “terrorchilar” deb atadi va ular bilan muzokara olib borishni rad etdi. Bu haqda Putin Qirg‘izistonda Shanxay hamkorlik tashkiloti sammiti doirasida jurnalistlar bilan suhbatda so‘z ochdi.

Uning aytishicha, Rossiya qo‘shinlari Donetsk viloyatida so‘nggi paytlarda 270 kvadrat kilometr hududni egallagan va Ukraina harbiylarining ikkita yirik guruhini qurshab olgan.

Rossiya Prezidenti Ukraina tomonidan Rossiya hududiga, xususan, neftni qayta ishlash zavodlariga amalga oshirilayotgan dron hujumlari zarar yetkazayotganini tan olgan. Biroq uning ta’kidlashicha, Rossiya havo mudofaasi tizimini kuchaytirgan va dronlarga qarshi kurash samaradorligi oshgan.

Putin Rossiyada yaqin orada yangi safarbarlik o‘tkazilishi mumkinligi haqidagi xabarlarni ham rad etgan. U bunday ma’lumotlarni “mutlaqo bema’ni” deb atadi.

Rossiya Prezidenti Germaniyaning Leypsig aeroportiga dron hujumi uyushtirilishida Moskva aybdorligi haqidagi xulosalarini ham rad etgan. Putin Germaniya Rossiyaga qarshi bunday ayblovlarni ilgari surish orqali dalillarni soxtalashtirayotganini bildirdi.

Shu bilan birga, Putin Ukraina rahbariyatini muzokaralar uchun legitim hamkor deb hisoblamasligini aytgan bo‘lsa-da, tinchlik muzokaralariga butunlay qarshi emasligini bildirgan. U AQSH Prezidenti Donald Trampning vakillari bilan mazmunli muzokaralar o‘tkazish imkoniyatini saqlab qolish zarurligini ta’kidlagan.

Putinning so‘zlariga ko‘ra, bunday muzokaralar faqat ular orqali sezilarli natijaga erishish imkoni bo‘lgan taqdirdagina ma’noga ega.

Rossiya Prezidentining bayonotlari Ukrainadagi urush to‘rt yarim yilga yaqinlashgan va jamiyatda urushdan charchoq kuchayib borayotgan bir sharoitda yangradi. Shu bilan birga, Moskva Ukrainadagi harbiy amaliyotlarni davom ettirish pozitsiyasini saqlab qolmoqda.

Eslatib o‘tamiz, avvaloq Rossiya Prezidenti Birlashgan Millatlar Tashkilotining (BMT) salohiyati hali to‘liq ochilmaganini bildirgandi.