Putin Ostonaga keldi (video)

Bugun, 27 noyabr kuni Rossiya Federatsiyasi Prezidenti Vladimir Putin davlat tashrifi bilan Ostonaga keldi. Aeroportda uni Qozog‘iston Prezidenti Qosim-Jomart To‘qayev kutib oldi. Bu haqda Oqo‘rda xabar berdi.

Qayd etilishicha, havo bandargohida Rossiya Prezidenti sharafiga faxriy qorovullar saf tortgan. Qozog‘iston va Rossiya xalqlari o‘rtasidagi samimiy do‘stlik belgisi sifatida ikki davlat bayroqlarini ko‘targan bolalar Prezident Vladimir Putin va rasmiy delegatsiya a’zolarini qutlagan.

Keyin professional rassom Asel Sabirjanqizi Vladimir Putin Ostonaga uchib kelgan paytdan boshlab chiza boshlagan rasmini davlat rahbarlariga taqdim etdi. Rasm Rossiya Prezidentiga tashrifi yakunida sovg‘a sifatida taqdim etiladi.

Ma’lumot uchun, Ostonada To‘qayev raisligida KXSHT Kollektiv xavfsizlik kengashi yig‘ilishi bo‘lib o‘tadi, unda Qozog‘iston, Rossiya, Belarus, Qirg‘iziston va Tojikiston rahbarlari ishtirok etadi. Ishtirokchi davlatlar mintaqaviy va xalqaro xavfsizlik masalalarini muhokama qiladi. Uchrashuv yakunlari bo‘yicha bir qator muhim hujjatlar imzolanadi.

Eslatib o‘tamiz, oldinroq Armaniston Bosh vaziri Nikol Pashinyan KXSHT sammitida ishtirok etmasligi xabar qilingandi.