Путин Остонага келди (видео)

Бугун, 27 ноябрь куни Россия Федерацияси Президенти Владимир Путин давлат ташрифи билан Остонага келди. Аэропортда уни Қозоғистон Президенти Қосим-Жомарт Тўқаев кутиб олди. Бу ҳақда Оқўрда хабар берди.

Қайд этилишича, ҳаво бандаргоҳида Россия Президенти шарафига фахрий қоровуллар саф тортган. Қозоғистон ва Россия халқлари ўртасидаги самимий дўстлик белгиси сифатида икки давлат байроқларини кўтарган болалар Президент Владимир Путин ва расмий делегация аъзоларини қутлаган.

Кейин профессионал рассом Асел Сабиржанқизи Владимир Путин Остонага учиб келган пайтдан бошлаб чиза бошлаган расмини давлат раҳбарларига тақдим этди. Расм Россия Президентига ташрифи якунида совға сифатида тақдим этилади.

Маълумот учун, Остонада Тўқаев раислигида КХШТ Коллектив хавфсизлик кенгаши йиғилиши бўлиб ўтади, унда Қозоғистон, Россия, Беларусь, Қирғизистон ва Тожикистон раҳбарлари иштирок этади. Иштирокчи давлатлар минтақавий ва халқаро хавфсизлик масалаларини муҳокама қилади. Учрашув якунлари бўйича бир қатор муҳим ҳужжатлар имзоланади.

Эслатиб ўтамиз, олдинроқ Арманистон Бош вазири Никол Пашинян КХШТ саммитида иштирок этмаслиги хабар қилинганди.