Pusanda AQSH qo‘shinlarining ombori yonib ketdi (video)

Koreya Respublikasining janubi-sharqida joylashgan Pusan shahrida AQSH qo‘shinlarining 55-ta’minot omborida yong‘in sodir bo‘ldi. Bu haqda mahalliy KBS telekanali xabar berdi.

Qayd etilishicha, yong‘in bugun, 24 oktyabr kuni mahalliy vaqt bilan taxminan 18:30 da sodir bo‘lgan. Favqulodda xizmat xodimlari bir necha soatdan beri olovni o‘chirishga urinishmoqda, ammo hali bunga erisha olmagan.

“Yong‘in manbasi shahar markazida joylashgani uchun Pusan hukumati fuqarolar xavfsizligiga alohida e’tibor bermoqda. Aholiga favqulodda vaziyatlarda qanday harakat qilish bo‘yicha ko‘rsatmalar bilan xabarlar yuborildi”, deyiladi xabarda.

Telekanalga ko‘ra, ayni paytda voqea joyida 160 dan ortiq favqulodda xizmat xodimlari va 50 dan ziyod texnik vositalar ishlamoqda. Mutaxassislar yong‘in binoning birinchi qavatida boshlangan bo‘lishi mumkinligini ma’lum qilgan.

“Bu yerda sanitariya ishlari olib borilgan”, deyiladi xabarda.

Bildirilishicha, ushbu ombor AQSHning harbiy texnikasi saqlanadigan joy hisoblanadi. Bu yerga Koreya Respublikasida joylashgan AQSH askarlari uchun mo‘ljallangan uskunalar olib kelingan.

Hozirgi vaqtgacha jabrlanganlar haqida hech qanday ma’lumot olinmagan. Hodisaning boshqa tafsilotlari aniqlanmoqda.

Eslatib o‘tamiz, avvalroq Amerika armiyasining Tenef mintaqasidagi bazalariga, Iroq chegarasi yaqinidagi Malikiya viloyatiga, Hasaka viloyatining Shaddadi va Dayr az-Zor hududiga kelib chiqishi noma’lum bo‘lgan hujumchi uchuvchisiz uchoqlar va yerdan yergacha bo‘lgan qurollar yordamida hujumlar uyushtirilgan edi.