Prezident qarori bilan 3 ta tibbiy markaz tashkil etildi

Avvalroq, O‘zbekiston Prezidenti “Reproduktiv yoshdagi ayollar, homiladorlar va bolalarga ko‘rsatiladigan yordam sifatini oshirish va ko‘lamini yanada kengaytirish to‘g‘risida”gi qarorni qabul qilgani haqida xabar bergan edik.

Prezident qaroriga muvofiq, quyidagilar tashkil etildi:

•    Respublika ixtisoslashtirilgan bolalar xirurgiyasi ilmiy-amaliy tibbiyot markazi;

•    Respublika bolalar tibbiy reabilitatsiya markazi;

•    Respublika ixtisoslashtirilgan akusherlik va ginekologiya ilmiy-amaliy tibbiyot markazi huzurida Yordamchi reproduktiv texnologiyalar markazi;

•    tuman (shahar) tibbiyot birlashmalarida, bolalar anesteziologiya-reanimatsiya va intensiv terapiya bo‘limlari hamda bemor bolalarga tunu kun shoshilinch tibbiy yordam ko‘rsatuvchi navbatchi shifokor postlari.

Ushbu markaz va bo‘limlarning asosiy vazifalari belgilandi.

Jumladan, Reabilitatsiya markazining asosiy vazifalaridan biri 18 yoshgacha bo‘lgan bemor bolalarning hayot sifatini yaxshilash, shuningdek salomatligini reabilitatsiya qilish orqali davolash, nogironlikning oldini olishdan iborat.