Prezident 8 ta viloyat va poytaxtda elektr energiyasi tejalmaganini tanqid qildi 

Respublikaning 8 ta viloyati va Toshkent shahri elektr energiyasini tejash rejasini bajarmagan. Bu haqda bugun, 11 avgust kuni Buxoro shahrida Prezident Shavkat Mirziyoyev raisligida o‘tayotgan videoselektorda ma’lum qilindi.

Qayd etilishicha, jahonda energiya resurslarini tejash masalasining dolzarbligi tobora ortib bormoqda. Shu bois O‘zbekistonda “yashil energetika”ni rivojlantirish va iqtisodiyotga energiya tejamkor texnologiyalarni keng joriy qilish bo‘yicha katta marralar olingan.

Yig‘ilishda energiya ta’minotidagi defitsitni to‘liq qoplash maqsadida aprel oyida har bir tuman va shaharda o‘rganishlar olib borilayotgani aytildi. Shu asosda 4,5 milliard kub metr gaz va 7,5 milliard kilovatt soat elektrni iqtisod qilish bo‘yicha tumanbay dasturlar qabul qilingan. 

“Ko‘p hudud va tarmoqlarda hali aytarli natija bo‘lgani yo‘q, rahbarlari esa “so‘rov bo‘lmayapti” deb, bu vazifalarni o‘z holiga tashlab qo‘ygan”, deydi davlat rahbari. 

Xususan, Toshkent viloyati rejaga nisbatan 40 million kub metr, Toshkent shahri 19 million, Samarqand 13 million, Xorazm 3,5 million kub metr gazni ko‘p iste’mol qilgani ma’lum qilingan. 

Shuningdek, yig‘ilishda elektr bo‘yicha Andijon, Buxoro, Jizzax, Namangan, Samarqand, Sirdaryo, Toshkent viloyati, Farg‘ona va Toshkent shahrining birorta tumani tejash rejasini bajarmagani hamda energetika kompleksi rahbarlari bu ishlarni pastda tizimli tashkil qila olmayotgani ko‘rsatib o‘tilgan.

Eslatib o‘tamiz, Prezident Shavkat Mirziyoyev raisligida o‘tayotgan videoselektorda Buxoro, Qashqadaryo va Namangan viloyatlarida dastlabki bosqichda 10 yil muddatga ijaraga berilgan 73 ming gektar yer maydonining ijara muddati 30 yilga uzaytirilishi belgilangan edi. Shuningdek, yig‘ilishda davlat rahbari O‘zbekistonda 94 ta tuman va shahar o‘z aholisining kartoshkaga bo‘lgan ehtiyojini to‘liq qondira olmayotgani ham tanqid ostiga olgan.