Pentagon Ukrainani 2027 yilgacha qo‘llab-quvvatlash dasturi tafsilotlarini oshkor qildi

Ukraina bo‘yicha aloqa guruhi ertaga, 9 yanvar kuni Germaniyaning Ramshteyn aviabazasida o‘tkaziladigan 25-yig‘ilishda Ukraina Qurolli kuchlarining 2027 yilgacha bo‘lgan ehtiyojlarini tasdiqlaydi. Bu haqda Pentagon bayonot berdi.

AQSH Mudofaa vazirligining yuqori martabali vakiliga ko‘ra, Kiyevning ittifoqchilari Ukrainaning harbiy ehtiyojlarini bir necha turga bo‘lib, sakkizta hududning har birida ta’minot uchun NATO davlatlarini tayinlaydi.

Uning so‘zlariga ko‘ra, Oq uy ma’muriyatidagi o‘zgarish Qurolli kuchlarni qurol-yarog‘ bilan ta’minlash rejalariga ta’sir qilmaydi.

“Men Yevropaning majburiyatlari, imkoniyatlari, tajribasi va missiyaga bo‘lgan yuksak ishonchiga juda ishonaman”, dedi u.

Pentagon matbuot kotibining qo‘shimcha qilishicha, har bir kichik guruh doirasidagi muvofiqlashtirish NATOga a’zo bo‘lgan kamida ikkita davlat tomonidan amalga oshiriladi.

“Ushbu koalitsiyalar yetakchilari Ukrainaning 2027 yilgacha havo kuchlari, zirhli texnika, artilleriya, minalardan tozalash, uchuvchisiz samolyotlar, integratsiyalashgan raketa va havo mudofaasi, axborot texnologiyalari va dengiz xavfsizligi kabi sohalardagi ehtiyojlari va maqsadlarini belgilab beruvchi yo‘l xaritalarini tasdiqlashi kerak”, deya tushuntirdi Amerika harbiy departamenti vakili.

Kecha AQSH Prezidenti Jo Baydenning iste’foga chiqqan ma’muriyatining Ukrainaga so‘nggi yordam paketini e’lon qilish rejalari ma’lum bo‘ldi. Pentagonning hisob-kitoblariga ko‘ra, uning prezidentlik davrida bu hajm 62 milliard dollardan oshgan.

Eslatib o‘tamiz, avvalroq AQSH Prezidenti Jo Bayden Ukrainaga qariyb 2,5 milliard dollarlik xavfsizlik yordamini e’lon qilgandi. Qo‘shimcha ravishda 1,25 milliard dollarlik harbiy yordam va 1,22 milliard dollarlik Ukrainaga xavfsizlik yordami tashabbusi (USAI) paketlari taqdim etiladi. Bu Ukraina harbiylari jang maydonida samarali foydalanayotgan qisqa muddatli imkoniyatlarni va uzoq muddatli havo hujumidan mudofaa, artilleriya va boshqa qurol tizimlari kabi zarur ta’minotni qamrab oladi.