Parij-2024 Olimpiya o‘yinlari dasturiga to‘rtta yangi sport turi kiritildi

Ayni kunlarda Shveysariyaning Lozanna shahrida Xalqaro Olimpiya qo‘mitasining 134-sessiyasi o‘z ishini davom ettirmoqda. Sessiya ishi 2026 yilgi qishki Olimpiada mezbonini aniqlash bilan boshlandi. Shundan so‘ng Olimpiya o‘yinlarining rivojini ko‘rib chiqish uchun bir qator sport turlarini Olimpiada dasturiga kiritish masalalari ham ko‘rib chiqildi.

Unga ko‘ra, uzoq yillik kuzatuvlardan so‘ng breyk-dans, skeytbording, syorfing va sport alpinizmi 2024 yili Parijda bo‘lib o‘tadigan Olimpiya o‘yinlari dasturiga kiritildi. Bu haqda MOQ Matbuot xizmati xabar tarqatdi.

“Ushbu 4 sport turi Olimpiya harakatini butun dunyo bo‘ylab rivojlanishiga o‘z xissasini qo‘sha oladi. Bu sport turlari gender-tenglikni saqlashi, yoshlarni sportga yanada jalb etishi bilan ahamiyatli”, dedi XOQ prezidenti Tomas Bax.

Sport alpinizmi va breyk-dans 2018 yili Argentina poytaxtida o‘tkazilgan o‘smirlar Olimpiadasida debyut qilib ulgurgan va o‘zining ommabopligi bilan ko‘pchilikning e’tiborini qozondi. Parij Olimpiadasida sport alpinizmi va skeytbording bo‘yicha 4 tadan, syorfing va breyk-dans bo‘yicha 2 tadan medallar komplekti o‘ynalishi tasdiqlandi.