Termizda soxta diplom rasmiylashtirayotgan kollej direktorining muovini ushlandi

Termiz bank kolleji direktori o‘rinbosari Muzrabot ijtimoiy-iqtisodiyot kasb-hunar kollejini bitirganlik to‘g‘risida soxta diplom rasmiylashtirib berishga uringan paytda huquqni muhofaza qilish organlari tomonidan qo‘lga olingan. Bu haqda Oliy va o‘rta maxsus ta’lim vazirligi xabar berdi.

Vazirlikning ta’kidlashicha, 2019-2020 o‘quv yili kasb-hunar kollejlari bitiruvchilariga diplomlarni topshirish ustidan nazoratni kuchaytirish maqsadida Oliy va o‘rta maxsus ta’lim vazirligining tegishli buyrug‘i qabul qilingan.

Buyruq bilan, Kasbiy ta’limni rivojlantirish va muvofiqlashtirish hududiy boshqarmalari hamda kasb-hunar kollejlarida diplom blanka (ilova)larini qabul qilish, hisobga olish, saqlash, topshirish va ulardan to‘g‘ri foydalanish bo‘yicha javobgar shaxslar belgilangan.

Shuningdek, kasb-hunar kollejlarining 2019-2020 o‘quv yili bitiruvchilarini o‘qishga qabul qilinganligi, 2- va 3-bosqichga o‘tganliklari to‘g‘risidagi buyruqlari asosida bitiruvchilarning ma’lumotlar bazasi yaratilgan.

"Mazkur ma’lumotlar bazasiga tegishli muddatda kasb-hunar kollejida ta’lim olmagan o‘quvchilarni kiritishning imkoni yo‘q!", deyilgan vazirlik xabarida.

Joriy yilda shaxsga tegishli diplomning xaqiqiyligi ushbu ma’lumotlar bazasi yordamida tekshiriladi.

Kasb-hunar kollejlarida Yakuniy Davlat attestatsiya imtihonlarini muvaffaqiyatli topshirgan bitiruvchilarga amaldagi qonun xujjatlari asosida davlat namunasidagi diplom rasmiylashtiriladi.

“Shunday ekan, hamyurtlarmizdan jinoiy ishlarga aralashib qolmaslikni va ta’lim olmagan kasb-hunar kollejlaridan soxta diplom olib beraman degan shaxslarga ishonib qolmaslikni so‘raymiz”, deyiladi vazirlik xabarida.