Ozarbayjon bizga qarshi yangi tajovuzga tayyorlanmoqda – Yerevan

Ozarbayjon o‘zining tajovuzkor so‘zlari va harakatlari bilan (tan olinmagan) Tog‘li Qorabog‘ armanlariga qarshi genotsidga, Armanistonga qarshi yangi tajovuzga tayyorlanmoqda. Armaniston Tashqi ishlar vazirligi o‘zining rasmiy saytida shunday baho berilgan bayonotni e’lon qildi. 

“Armaniston Tashqi ishlar vazirligining bahosi aniq. Ozarbayjon o‘zining tajovuzkor so‘zlari va harakatlari bilan Tog‘li Qorabog‘ armanlariga qarshi genotsidga va Armanistonga qarshi yangi tajovuzga tayyorlanmoqda”, deyiladi TIV xabarida. 

Armaniston Tashqi ishlar vazirligi ta’kidlaganidek, 18 mart kuni Ozarbayjon Prezidenti Ilhom Aliyev 44 kunlik urush natijasida arman aholisi tashlab ketgan Tog‘li Qorabog‘dagi Talish qishlog‘iga borib, tinchlik kelishuvi bo‘lmasligi haqida bayonot bergan. 

“Ozarbayjon Talishda ham, mintaqaning arman aholisi tark etgan boshqa hududlarda ham o‘z nazorati ostida bo‘lgan Tog‘li Qorabog‘ hududidan arman izlarini yo‘q qilish maqsadida ochiqdan-ochiq ko‘chirish dasturlarini amalga oshirmoqda”, deydi Armaniston TIV. 

Hujjatda qayd etilishicha, o‘tgan asrning 90-yillari boshlarida xuddi shunday taqdir Shaumyan va Getashen viloyatlari hamda arman aholisi ko‘p bo‘lgan boshqa aholi punktlari boshiga tushgan. 

“Ozarbayjonning xatti-harakatlari 2020 yil 9 noyabrdagi uch tomonlama bayonotning 7-bandiga to‘g‘ridan-to‘g‘ri zid keladi, unga ko‘ra ichki ko‘chirilganlar va qochqinlar Tog‘li Qorabog‘ va unga tutash hududlarga BMTning Qochqinlar bo‘yicha Oliy komissarligi nazorati ostida qaytariladi. Tog‘li Qorabog‘ armanlarini noqonuniy ko‘chirish siyosati va terror amaliyoti bilan rasmiy Baku uch tomonlama deklaratsiya bandini bajarish imkonsiz bo‘lishi uchun hamma narsani qilmoqda”, deyiladi Armaniston TIV bayonotida. 

Ozarbayjon turli formatlarda qabul qilingan uch tomonlama va to‘rt tomonlama deklaratsiyalarni qo‘pol ravishda buzishda davom etmoqda va amalda bu deklaratsiyalarning Ozarbayjon tomonidan buzilmagan birorta bandi yo‘q, deya qayd etadi Armaniston TIV. Armaniston tomoni hozirgi vaziyatda genotsidning oldini olishning xalqaro mexanizmlarini ishga tushirish, Lochin yo‘lagi va Tog‘li Qorabog‘ga xalqaro faktlarni aniqlash missiyasini jo‘natish, shuningdek, Ozarbayjonning tajovuzkor harakatlari va siyosatini bevosita qoralash zarur, deb hisoblaydi. 

Eslatib o‘tamiz, Ozarbayjon Prezidenti Ilhom Aliyev joriy yilning 18 mart kuni Navro‘z bayrami munosabati bilan Ozarbayjon xalqiga Terter tumani Talish qishlog‘idan qilgan Murojaatnomasida Armaniston yana Ozarbayjonga qarshi hududiy da’volarni davom ettirayotganini aytgan edi.