Olimlar yangi qon guruhlari tizimini kashf qildi

NHSBT Xalqaro qon guruhi referent laboratoriyasi va Bristol universiteti olimlari MAL deb nomlangan yangi qon guruhi tizimini kashf qildi. Tadqiqot natijalari “Blood” jurnalida chop etildi.

Nashrning yozishicha, an’anaviy ravishda qon guruhlari birinchi, ikkinchi, uchinchi va to‘rtinchi turlarga bo‘linadi. Ularning har birida qizil qon hujayralarida maxsus sirt belgilari (antigenler) mavjud. Shu bilan birga, qon yanada murakkab tarkibga ega va hozirgi kunga qadar olimlar 360 dan ortiq antigenlarning mavjudligini hisobga olgan holda 47 ta qon guruhi tizimini aniqladi.

Britaniyalik tadqiqotchilar tomonidan ishlab chiqilgan yangi tizim qon guruhlarini MAL oqsili orqali uzatiladigan AnWj antigeni bo‘yicha tasniflashga asoslangan. Olimlarning fikricha, musbat genotipli odamlardan AnWj manfiy genotipli kishilarga qon quyilganda salbiy reaksiya yuzaga kelishi mumkin.

Aholining 99,9 foizdan ortig‘i ijobiy AnWj genotipiga ega. Biroq, olimlar salbiy genotipga ega bo‘lgan bir nechta vakillarni aniqlagan. Salbiy AnWj’ning eng keng tarqalgan sabablari gematologik kasallik va saratonning ayrim turlari bo‘lgan. Faqat bir nechta odam genetik omillar tufayli bu xususiyatga ega.

Olimlarning fikriga ko‘ra, ularning kashfiyoti noyob qon xususiyatlariga ega bo‘lgan shaxslarni aniqlashga va ular uchun qon quyish tartibini optimallashtirishga yordam beradi.

Eslatib o‘tamiz, avvalroq Buyuk Britaniyada o‘pka saratoniga chalingan 67 yoshli londonlik erkak xalqaro sinov doirasida birinchi bo‘lib saratonga qarshi yangi vaksina olgan edi.