OCHLning ikki karra chempion klubi professional faoliyatini yakunladi

Osiyo Chempionlar ligasining ikki karra g‘olibi va Xitoyning sakkiz karra chempioni “Guanchjou” 2025 yilda professional futbolda ishtirok etmaydi. Bu haqda klub matbuot xizmati xabar berdi.

Manbaga ko‘ra, Xitoy futbol assotsiatsiyasi moliyaviy muammolar tufayli jamoaga yangi mavsumda ishtirok etish uchun ruxsat bermagan.

“Klub yangi mavsumda professional ligaga kirish uchun juda ko‘p harakatlarni amalga oshirdi, ammo yillar davomida orttirilgan katta qarz tufayli, professional ligada ishtirok etish uchun mablag‘ yetarli emas”, deyiladi bayonotda.

Ma’lumot o‘rnida, “Guanchjou” 2011 yildan 2017 yilgacha, shuningdek, 2019 yilda Xitoy chempionatida g‘olib chiqdi. Jamoa 2013 va 2015 yillarda Osiyo Chempionlar Ligasida g‘olib chiqdi. Yillar davomida Marchello Lippi, Luis Felipe Skolari va Fabio Kannavaro kabi dunyoga mashhur mutaxassislar “Guanchjou” klubiga murabbiylik qilgan. Jamoa so‘nggi yillardan beri Xitoy birinchi ligasida o‘ynab kelayotgan va o‘tgan mavsumda Superligaga chiqa olmagan edi.