Obama ham Trampni g‘alabasi bilan tabrikladi

AQSHning sobiq prezidenti, demokrat Barak Obama respublikachi Donald Trampni prezidentlik saylovidagi g‘alabasi bilan tabrikladi. Bu haqda bugun, 7 noyabrga o‘tar kechasi AFP xabar berdi.

Rafiqasi Mishel bilan saylovoldi kampaniyasida Demokratik partiyadagi Kamola Harrisni faol qo‘llab-quvvatlagan Obama hokimiyatning tinch yo‘l bilan o‘tkazilishi muhimligini ta’kidlagan.

“Ochig‘i, bu biz kutgan natija emas. Lekin demokratiyada yashash bizning pozitsiyamiz har doim ham g‘alaba qozonmasligini qabul qila olish va hokimiyatning tinch yo‘l bilan o‘tkazilishiga rozi bo‘lishni ham anglatadi”, dedi sobiq prezident.

Barak Obama AQSHning amaldagi vitse-prezidenti Kamola Harris va uning saylovdagi sherigi Tim Uolzni “ajoyib kampaniyani boshqargan ikki favqulodda davlat xizmatchisi” deb atadi.

Harrisning o‘zi ham kecha, 6 noyabr kuni Trampga qo‘ng‘iroq qilib, uni g‘alabasi bilan tabriklagan. Shu bilan birga, u hokimiyatning tinch yo‘l bilan almashishi muhimligini va prezident sifatida barcha amerikaliklarning manfaatlarini hisobga olish zarurligini ta’kidladi. Shu bilan birga, demokrat “barcha odamlar uchun erkinlik, imkoniyat, adolat va qadr-qimmat uchun hamda Amerika xalqining qalbini tashkil etuvchi g‘oyalar uchun” kurashni to‘xtatmasligini qo‘shimcha qildi.  

Ayni paytda Donald Trampning saylovoldi shtab-kvartirasi 7 noyabrga o‘tar kechasi yaqin haftalarda hukumat lavozimlariga nomzodlar to‘g‘risida qaror qabul qilishini ma’lum qildi. 

“Ular saylangan prezident rahbarligida ishlaydi va amerikaliklarning hayotini moliyaviy jihatdan qulay va xavfsiz qiladigan siyosatni amalga oshiradi”, deyiladi shtab-kvartira xabarida.

Respublikachilar Kongressning har ikki palatasida 2021 yildan beri birinchi marta Senatda ko‘pchilik o‘rinni qo‘lga kiritishi kutilmoqda.

Eslatib o‘tamiz, oldinroq NATO Bosh kotibi Mark Ryutte, Isroil Bosh vaziri Binyamin Netanyaxu, Fransiya Prezidenti Emmanuel Makron, Yevropa Komissiyasi rahbari Ursula fon der Lyayen va Ukraina Prezidenti Vladimir Zelenskiy, Markaziy Osiyo yetakchilaridan Qirg‘iziston Prezidenti Sadir Japarov, Qozog‘iston Prezidenti Qosim-Jomart To‘qayev va O‘zbekiston Respublikasi Prezidenti Shavkat Mirziyoyev Donald Trampni Amerika Qo‘shma Shtatlari Prezidenti etib saylangani bilan tabrikladi.

Jasmina Rasulova