Nukusdagi poliklinikaga 2 ming dollar evaziga ishga kiritishni va’da qilgan mansabdor ushlandi

Buxoro viloyati va Qoraqalpog‘iston Respublikasida pul evaziga ishga kiritib qo‘yishni va’da qilgan shaxslar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar qildi. 

Fuqarolar – Z.K. va D.K. o‘zaro til biriktirib, fuqaro M.R.ni yuqori lavozimda ishlovchi tanishlari yordamida Buxoro Perinatal markaziga ishga kiritib qo‘yishi evaziga 2 500 AQSH dollarini olgan vaqtlarida ashyoviy dalillar bilan  ushlangan.

Qoraqalpog‘iston Respublikasi bolalar tibbiyot reabilitatsiya markazida bo‘lim boshlig‘i G.X. fuqaro A.A.ni yuqori lavozimda ishlovchi tanishlari yordamida 2 000 AQSH dollari evaziga Nukusdagi oilaviy poliklinikaga ishga kiritib qo‘yishini aytib, 22 mln so‘mni olgan vaqtida ashyoviy dalillar bilan qo‘lga tushgan. 

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.