Netanyaxu dunyodan yordam so‘ramoqda

Isroil Bosh vaziri Binyamin Netanyaxu Germaniya kansleri Fridrix Mers, Fransiya rahbari Emmanuel Makron hamda Hindiston Bosh vaziri Narendra Modi bilan muloqot qildi. Bu haqda Bosh vazir devonining maslahatchisi Dmitriy Gendelman o‘zining Telegram sahifasida yozib qoldirdi. 

Uning so‘zlariga ko‘ra, Bosh vazir bir qator davlat rahbarlari bilan suhbat qilgan va hozir AQSH rahbari Donald Tramp va Rossiya Prezidenti Vladimir Putin bilan suhbatga tayyorlanmoqda. 

“Bosh vazir Binyamin Netanyaxu Germaniya kansleri, Hindiston Bosh vaziri va Fransiya Prezidenti hamda boshqa jahon yetakchilari bilan bir qator muzokaralar o‘tkazdi. Yaqin vaqt ichida u AQSH Prezidenti Donald Tramp, Rossiya Prezidenti Vladimir Putin va Buyuk Britaniya Bosh vaziri Kir Starmer bilan ham vaziyatni muhokama qilishni rejalashtirmoqda”, deyiladi Gendelmanning xabarida. 

Ma’lum qilinishicha, o‘tkazilgan suhbatlar davomida yetakchilar “Eron tomonidan yo‘q qilish tahdidi ostida bo‘lgan Isroil xavfsizligini ta’minlash zaruratini tushunib, unga hamdardlik bildirgan”. Bosh vazir esa yaqin kunlarda ular bilan doimiy aloqada bo‘lishini ta’kidlagan.

Eslatib o‘tamiz, avvalroq Isroil Eronning “yadroviy dasturiga qarshi” zarba berganini e’lon qilgan edi. Isroil Bosh vaziri Binyamin Netanyaxuning aytishicha, operatsiyaning maqsadi “Eron yadroviy infratuzilmasiga, ballistik raketa ishlab chiqaruvchi zavodlariga va harbiy salohiyatiga zarar yetkazish” bo‘lgan.

Hujum oqibatida Eron islom inqilobi qo‘riqchilari korpusi qo‘mondoni general-mayor Husayn Salamiy halok bo‘ldi. IRNA va “Tasnim” axborot agentliklari xabariga ko‘ra, shuningdek, Eron Atom energiyasi tashkilotining sobiq rahbari Fereydun Abbosiy va Islomiy Ozod universiteti prezidenti Muhammad Mehdi Tehronchiy ham vafot etgan.

Eronning davlat IRIB telekanali ham Natanzdagi yadroviy dastur uchun muhim bo‘lgan ob’ektlarda bir nechta portlashlar sodir bo‘lganini xabar qildi.

Eron hukumati esa Isroil tomonidan o‘z hududiga uyushtirilgan, tinch aholi, jumladan, olimlar va harbiylar halok bo‘lgan zarbalariga qattiq javob berishini ma’lum qildi.

O‘zbekistonning Eron va Isroildagi elchixonalari ushbu mamlakatlardagi fuqarolarga ogohlantirish bilan chiqib, qat’iy ehtiyot choralarini ko‘rishga chaqirdi. 

Shuningdek, O‘zbekiston Tashqi ishlar vazirligi ham fuqarolarga tegishli murojaat bilan chiqdi.