Netanyaxu AQSHni Eronga qarshi harbiy ittifoq tuzishga taklif qildi
Olam
−
25 iyul 3842
Isroil Bosh vaziri Binyamin Netanyaxu AQSHga Eron tahdidiga qarshi turish uchun o‘z mamlakati bilan harbiy ittifoq tuzishni taklif qildi. Bu haqda u kecha, 24 iyul AQSH Kongressida so‘z ochdi.
Netanyaxu Vashingtonni Isroilga G‘azo sektoridagi HAMAS guruhini tezda mag‘lub etishi uchun harbiy yordam yetkazib berishni tezlashtirishga chaqirdi. Netanyaxuning iddao qilishicha, Isroilning HAMASga qarshi urushi ikki sivilizatsiya o‘rtasidagi ziddiyat emas, balki “sivilizatsiya va vahshiylik o‘rtasidagi, hayot muqaddas bo‘lganlar va o‘limni ulug‘laydiganlar o‘rtasidagi to‘qnashuv”.
Uning da’vo qilishicha, Isroil nafaqat o‘ziga, balki AQSH va arab dunyosiga ham tahdid solayotgan terrorizmga qarshi urush olib bormoqda.
“Eron ham HAMAS, ham Livanning “Hizbulloh” guruhi va Yaman husiylari ortida turibdi”, deydi Isroil Bosh vaziri.
U Tehrondagi hukmron rejimni Yaqin Sharq va butun dunyo xavfsizligiga asosiy tahdid deb atadi. Isroil Bosh vaziri Falastin tarafdorlarining namoyishlarida qatnashganlarni – shunday namoyishlardan biri Vashingtondagi Kongress binosi oldida Netanyaxu u yerda nutq so‘zlaganida bo‘lib o‘tdi – “zo‘rlovchilar va qotillar tomonidagi” “Eronning foydali ahmoqlari” deb atadi.
Shuningdek, Netanyaxu Isroil zarbalari G‘azo sektoridagi tinch aholiga qaratilgani haqidagi ayblovlarni rad etdi.
“Isroil armiyasi Falastinlik tinch aholiga zarar yetkazmaslik uchun millionlab varaqalarni tashladi, millionlab SMS yubordi, yuz minglab telefon qo‘ng‘iroqlarini amalga oshirdi”, deya iddao qildi Bosh vazir.
AQSH qonunchisi Rashida Tlaib Netanyaxuning Kongressdagi nutqi vaqtida “harbiy jinoyatchi” degan yozuvni ko‘tarib turdi. Nutq yakunida o‘rnidan turib, Netanyaxuni olqishlagan kongressmenlardan farqli o‘laroq, o‘tirib o‘z noroziligini bildirdi.
Ma’lumot uchun, 20 may kuni Xalqaro jinoiy sud bosh prokurori Karim Xon Binyamin Netanyaxu va Isroil mudofaa vaziri Yoav Galantni Falastin hududida urush jinoyatlari va insoniyatga qarshi jinoyatlarda ayblab, hibsga olish uchun order berishni talab qildi. Uning aytishicha, Netanyaxu va Galant “Falastin tinch aholisiga qarshi keng ko‘lamli va tizimli hujumlar” uchun mas’uldir”.
Shu bilan birga, u HAMASning uch yetakchisi: Yahyo Sinvar, Muhammad Al-Masri va Ismoil Xoniyani hibsga olish uchun order berdi. Ular, shuningdek, urush jinoyatlari va insoniyatga qarshi jinoyatlar, jumladan, qotillik, garovga olish, jinsiy zo‘ravonlik va qiynoqlarda ayblanmoqda.
