Navoiyda bog‘cha sifatsiz qurilayotgani aniqlandi

Navoiy viloyatidagi bog‘chada qurilish sifatsiz olib borilayotgani aniqlanib, undagi ishlar vaqtincha to‘xtatildi. Bu haqda Qurilish va uy-joy kommunal xo‘jaligi vazirligi xabar berdi.

Qayd etilishicha, Navoiy viloyati Qurilish va uy-joy kommunal xo‘jaligi sohasida hududiy nazorat qilish inspeksiyasi xodimlari tomonidan belgilangan tartibda nazorat tadbirlari olib borilmoqda. Xususan, Karmana tumani “Talqoq” MFY hududida “Yagona buyurtmachi xizmati” IK buyurtmachiligida qurilayotgan 120 o‘rinli maktabgacha ta’lim tashkiloti binosining ikkinchi qavati “G” o‘qining uchinchi hamda to‘rtinchi qatorlaridagi g‘isht terish ishlari va beton o‘zaklar sifatsiz hamda loyiha talablari asosida bajarilmagani aniqlangan.

Mazkur qoidabuzarliklar sabab inspeksiya xodimlari tomonidan ob’ektda qurilish ishlari vaqtinchalik to‘xtatilgan hamda sifatsiz bajarilgan ishlar joyida buzdirilgan.

Eslatib o‘tamiz, avvalroq Toshkent viloyati Yangiyo‘l shahri Kamolot ko‘chasidagi ko‘p qavatli turarjoy binosi sifatsiz qurilayotgani aniqlanib, unda olib borilayotgan qurilish ishlari to‘xtatilgandi.