Navoiy IESda yong‘in chiqdi (video)

Bugun, 5 yanvar kuni Navoiy viloyatining Karmana tumanida joylashgan issiqlik elektr stansiyasidagi 12-sonli transformatorda yong‘in sodir bo‘ldi. Bu haqda Energetika vazirligi xabar berdi.

Qayd etilishicha, soat 14:29 da yuzaga kelgan yong‘in Navoiy IES Yong‘in xavfsizligi xizmati hamda viloyat Favqulodda vaziyatlar boshqarmasi tomonidan soat 14:49 da qurshab olinib, to‘liq bartaraf etilgan.

Viloyat Favqulodda vaziyatlar boshqarmasi bergan ma’lumotga ko‘ra esa yong‘in sodir bo‘layotganligi haqida navbatchi dispetcherlik xizmatiga soat 14:34 da xabar kelib tushgan. Hodisa joyiga yong‘in qutqaruv ekipajlari soat 14:37 da yetib borib, 14:49 da yong‘in maydoni o‘rab olinib, 15:14 da yong‘in o‘chirilgan. Yong‘inga 8 ta yong‘in qutqaruv ekipaji jalb etilgan. Yong‘in oqibatida aholi yashash xonadonlari, ijtimoiy va ishlab chiqarish ob’ektlarini elektr energiyasi bilan ta’minlashda uzilishlar sodir bo‘lmagan.

Yong‘in tufayli jabrlangan va halok bo‘lganlar yo‘q. Hozirda hodisa sababi va zarar miqdori aniqlanmoqda.