Navalniy jamoasi Rossiya Mudofaa vaziri “zam”ining AQSH bilan aloqalarini fosh qildi

Kecha, 10 avgust kuni rossiyalik muxolifatchi siyosatchi Aleksey Navalniyning sheriklari Rossiya Mudofaa vaziri o‘rinbosari Aleksey Krivoruchko va uning AQSH bilan aloqalari bo‘yicha surishtiruvni e’lon qildi.

Navalniyning YouTube’dagi kanalida e’lon qilingan 11 daqiqalik videoda amaldor xizmatga kirishdan oldin Mayamida qanday qo‘nim topgani va qizlarini Amerika pasportlari bilan ta’minlagani haqida hikoya qilinadi.

Tergov ma’lumotlariga ko‘ra, Mudofaa vazirligiga tayinlanishidan oldingi olti yil ichida Krivoruchko Qo‘shma Shtatlarga 26 marta, ko‘pincha Mayamida bo‘lgan. 2011 yilda u o‘sha yerda 5256 Fisher Island Drive kompaniyasini ochgan va u kvartirani ro‘yxatdan o‘tkazgan. 255 kvadrat metrlik kvartira bir necha million dollarga baholanmoqda. Keyinchalik Krivoruchko uni o‘z kompaniyasining xodimi Mixail Tiraturyan nomiga qayta rasmiylashtirgan.

“Bloomberg” tomonidan 2018 yilda e’lon qilingan ma’lumotga ko‘ra, Tiraturyan Krivoruchko boshchiligidagi Rossiyaning Kalashnikov konserni mahsulotlarini AQSHda sotishni yo‘lga qo‘yishi kerak bo‘lgan.

Rublyovkada uy

Mayamiga safarlarida Rossiya Federatsiyasi Mudofaa vaziri o‘rinbosariga rafiqasi – “Miss Moskva-2001” unvoni sohibi Yekaterina Toropova hamroh bo‘lgan, u 2007 yilda erining familiyasiga pasport olgan. Navalniy jamoasi 2012 yil 4 avgust kuni AQSHda juftlikdan Sofiya ismli qiz tug‘ilganini aniqlagan va bu unga Amerika fuqaroligini olish imkonini bergan. Krivoruchkoning 2016 yil 23 sentyabrda tug‘ilgan ikkinchi qizi Anna ham AQSH fuqaroligini olish huquqiga ega. O‘sha paytda Yekaterina Krivoruchko AQSHda bo‘lgan.

Rossiyada Krivoruchkoning bir qancha hashamatli mulki ham bor, deydi Navalniyning hamkorlari. 2019 yilda u Rublyovkada 1492 kvadrat metrlik uy va qiymati 500 million rubldan ortiq 35 gektar yer sotib olgan. Yana 116 gektar deklaratsiya qilinmagan yer uning kompaniyasi tomonidan uzoq muddatli foydalanishda.