Namanganda piyodani urib, qochib ketgan Gentra haydovchisi ushlandi

Kecha, 11 fevral kuni Namangan viloyati Namangan shahrida piyodani urib, o‘limiga sababchi bo‘lgan va voqea joyidan qochib ketgan Gentra haydovchisi aniqlandi. Bu haqda viloyat IIB Yo‘l harakati xavfsizligi boshqarmasi xabar berdi.

Qayd etilishicha, olib borilgan tezkor-qidiruv ishlari natijasida yo‘l transport hodisasini sodir etgan haydovchi va transport vositasi aniqlangan.

“Ushbu holatni sodir etgan shaxs Namangan shahar hududida yashovchi 1997 yilda tug‘ilgan fuqaro ekanligi aniqlandi”, deyiladi xabarda.

Ma’lum qilinishicha, holat yuzasidan qonuniy chora ko‘rish maqsadida tergov bo‘limiga transport vositasi hamda haydovchi olib kelingan.

Mazkur holat yuzasidan Namangan shahar IIB huzuridagi Tergov bo‘limi tomonidan O‘zbekiston Respublikasi Jinoyat Kodeksining 117-moddasi 2-qismi (Xavf ostida qoldirish) va 266-moddasi 2-qismi (Transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilgan.

Eslatib o‘tamiz, avvalroq Toshkent shahrining Shayxontohur tumanida Gentra haydovchisi bir necha fuqarolarni bosib ketishga uringandi.