Namanganda gaz portlashi oqibatida 2 kishi kuydi

Namangandagi xonadonlardan birida gaz portladi. Oqibatda 2 kishi kuyish jarohatini oldi. Bu haqda viloyat Favqulodda vaziyatlar boshqarmasi ma’lum qildi.

Bugun, 13 yanvar kuni soat tungi 02:30 larda Namangan tumani “Navro‘z” mahallasi hududidagi xonadonlarning birida gaz portlagan.

Portlash oqibatida xonadon egasining 1992 yilda tug‘ilgan qizi 70% hamda u bilan birga yashovchi farzandi 2014 yilda tug‘ilgan o‘g‘li 8% darajada kuyib ketgan.

Portlashga yashash uyiga o‘rnatilgan o‘tin va tabiiy gazga moslashtirilgan tunika isitish pechining gaz jo‘mragi ochiq qolishi sabab bo‘lgan. Fuqaro uyga kelib, elektr chirog‘ini yoqqan, gaz va havo aralashmasi oqibatida chaqnash sodir bo‘lgan. 

Portlashdan so‘ng, yong‘in sodir bo‘lmagan, uyning derazasi joyidan ko‘chgan. Voqea joyiga yong‘in o‘chirish ekipajlari jalb etilmagan.

Eslatib o‘tamiz, Namangan viloyatining Kosonsoy tumanida yuz bergan yong‘inda bir oilaning ikki a’zosi, er-xotin uyga qo‘shilib yonib ketgani haqida xabar berilgandi.