Namanganda dahshatli avtohalokat sodir bo‘ldi (video)

Ijtimoiy tarmoqlarda Namangan viloyati Chust tumanida dahshatli avtohalokat sodir bo‘lgani va oqibatida 5 kishi halok bo‘lgani haqida xabarlar tarqaldi. Namangan viloyati IIB YHXB axborot xizmati holat yuzasidan munosabat bildirdi.

Ma’lum qilinishicha, joriy yilning 8 yanvar kuni soat 08:45larda Chust tumani "Qorakapa" MFY hududidan o‘tgan D-116 “Chust-Axcha-Pop” avtomobil yo‘lining 8-kilometrida Lacetti rusumli avtomobilni boshqarib ketayotgan haydovchi boshqaruvini yo‘qotgan va yo‘lning qarama-qarshi yo‘nalishiga o‘tib, o‘z yo‘nalishida harakatlanib kelayotgan Damas va Labo rusumli transport vositalari bilan to‘qnashuv sodir etgan.

Qayd etish kerakki, vafot etganlar haqida rasmiy axborot e’lon qilinmagan va hozirda holat yuzasidan surishtiruv ishlari davom ettirilayotgani bildirilgan.

Eslatib o‘tamiz, avvalroq Navoiy viloyatida Yangi yil tadbiriga ketayotgan bog‘cha mudiralari “Konimex–Zarafshon” yo‘nalishidagi avtomobil yo‘lida yo‘l transport hodisasiga uchrashi oqibatida 79 yoshli bog‘cha mudirasi vafot etgandi.