Namanganda 3 kishining o‘limiga sababchi bo‘lgan 19 yoshli haydovchi qamaldi

Namangan viloyatining Uychi tumanida mast holda mashina boshqarib, uch kishining o‘limiga sababchi bo‘lgan 19 yoshli yigit 6 yilga ozodlikdan mahrum qilindi. Bu haqda “Mening yurtim” xabar berdi.

Qayd etilishicha, ushbu yo‘l-transport hodisasi 2024 yilning 29 oktyabr kuni ro‘y bergan. Sudlanuvchi yigit do‘stlari bilan tungi klubda spirtli ichimlik iste’mol qilgan. So‘ngra o‘ziga tegishli bo‘lmagan Captiva mashinasini haydovchilik guvohnomasi yo‘qligiga qaramay, “Uchqo‘rg‘on-Uychi-Namangan” yo‘lida soatiga 100 kilometr tezlikda boshqargan. Oqibatda Cobalt ichida bo‘lgan uch nafar shaxs voqea joyida vafot etgan.

north_east

O‘zbekistonda bir yilda 2 mingdan ortiq odam YTH oqibatida halok bo‘lgan (video)

Holat yuzasidan Jinoyat ishlari bo‘yicha Uychi tuman sudida bo‘lib o‘tgan sud majlisida yigit Jinoyat kodeksining 266-moddasi 3-qismi “a” bandi (transport vositalari harakati yoki ulardan foydalanish xavfsizligi qoidalarini buzish odamlar o‘limiga sabab bo‘lishi) bilan aybdor deb topildi va 6 yilga ozodlikdan mahrum qilindi. Shuningdek, unga 3 yil muddatga barcha turdagi transport vositasini boshqarish taqiqlandi. Jazoni manzil-koloniyada o‘tattirish belgilandi.

Eslatib o‘tamiz, avvalroq Toshkent shahrining Mirzo Ulug‘bek tumani Buyuk Ipak yo‘li ko‘chasida joriy yilning 21 yanvar kuni 3 ta avtomobil ishtirokida yo‘l-transport hodisasi sodir bo‘lib, oqibatda bir piyoda halok bo‘lgandi.