Muftiy ham gaz portlagan masjidga jo‘nab ketdi

Bugun, 31 mart kuni tushdan keyin Andijon viloyatidagi masjidlardan birida sodir bo‘lgan baxtsiz hodisadan so‘ng O‘zbekiston musulmonlari idorasi raisi, muftiy Shayx Nuriddin Xoliqnazar ham voqea joyiga jo‘nab ketdi. Bu haqda O‘zbekiston musulmonlari idorasi matbuot xizmati xabar berdi.

Ma’lumki, viloyatning Izboskan tumani “Ahmadali hoji” jome masjidi tahoratxonasida havo-gaz aralashmasining chaqnashi oqibatida binoning tom qismi qulab tushgan. 

Dastlabki ma’lumotlarga ko‘ra, talafot oqibatida 3 nafar fuqaro halok bo‘lgan, 10 nafar fuqaro tan jarohati olib, shifoxonaga yuborilgan.

Eslatib o‘tamiz, oldinroq hodisa sodir bo‘lgani xabar qilinganida vodiyda bo‘lib turgan Bosh vazir o‘rinbosari Ochilboy Ramatov hamda Favqulodda vaziyatlar vaziri general-mayor Botir Qudratxo‘jayev Izboskan tumaniga yetib borgandi. Hozirda mazkur holat yuzasidan dastlabki tergovoldi surishtiruv ishlari olib borilmoqda.