Masjiddagi gaz portlashida 3 kishi halok bo‘ldi

Avvalroq, Andijon viloyati Izboskan tumanida joylashgan masjidda gaz portlagani haqida xabar berilgan edi. Ushbu portlashda 3 kishi halok bo‘ldi. Bu haqda Favqulodda vaziyatlar vazirligi xabar berdi.

Ma’lum qilinishicha, bugun, 31 mart kuni soat 12:19 da Andijon viloyati Izboskan tumani “Mirzo Ulug‘bek” MFY Yangibozor ko‘chasida joylashgan masjid hududidagi tahoratxonada gaz-havo aralashmasining chaqnashi sodir bo‘lgani to‘g‘risida Andijon viloyati FVBga xabar kelib tushgan.

Zudlik bildan aytilgan manzilga 2 ta qutqaruv otryadi va 2 ta yong‘in-qutqaruv ekipaji yetib borgan. Hodisa oqibatida tahoratxona devor va tom konstruksiyalariga zarar yetgan, yong‘in sodir bo‘lmagan.

Xabarga ko‘ra, chaqnash oqibatida 3 nafar fuqaro halok bo‘lgan, 10 nafar fuqaro tan jarohati olib, shifoxonaga yuborilgan.

“Voqea joyiga viloyat hokimi, FVB, IIB, MG, SSB, prokuratura va “Hududgazta’minot”, tuman Favqulodda vaziyat davlat quyi tizimi xizmatlari kuch, vositalari yetib borib, hodisa oqibatlari bartaraf etilmoqda”, deyiladi xabarda.

Qo‘shimcha qilinishicha, hodisa sodir bo‘lgani xabar qilinganida vodiyda bo‘lib turgan Bosh vazir o‘rinbosari Ochilboy Ramatov hamda Favqulodda vaziyatlar vaziri general-mayor Botir Qudratxo‘jayev Izboskan tumaniga yetib borgan.

Hozirda mazkur holat yuzasidan dastlabki tergovoldi surishtiruv ishlari olib borilmoqda.

Eslatib o‘tamiz, 12 mart kuni Farg‘ona viloyati Qo‘qon shahrida joylashgan ko‘p qavatli uylarning birida gaz-havo aralashmasining chaqnashi sodir bo‘lgan va buning ortidan yong‘in chiqqandi. 27 mart kuni esa Toshkent viloyatining Toshkent tumanidagi 5 qavatli uning 2-qavatida joylashgan xonadonda to‘planib qolgan tabiiy gazning chaqnashi oqibatida portlash sodir bo‘ldi.