Mirziyoyev va Erdo‘g‘an bir-birini Ramazon hayiti bilan tabrikladi

O‘zbekiston Respublikasi Prezidenti Shavkat Mirziyoyev va Turkiya Respublikasi Prezidenti Rajab Toyib Erdo‘g‘an bugun, 30 mart kuni bo‘lib o‘tgan telefon orqali muloqotda butun musulmon ummati uchun muqaddas bo‘lgan Ramazon hayiti munosabati bilan bir-birini samimiy qutladi. Davlat rahbarlari qardosh xalqlarga tinchlik, farovonlik va ravnaq tiladi. Bu haqda Prezident matbuot xizmati xabar berdi.

“O‘zbekiston-Turkiya keng qamrovli strategik sheriklik munosabatlarini yanada rivojlantirish va mustahkamlashning dolzarb masalalari ko‘rib chiqildi.

Barcha darajalarda faol muloqotlar davom etayotgani katta mamnuniyat bilan qayd etildi. Tovar ayirboshlash va investitsiyalar hajmi, qo‘shma loyiha va korxonalar soni, to‘g‘ridan-to‘g‘ri aviaqatnovlar ko‘paymoqda”, deyiladi xabarda.

Shuningdek, suhbat davomida oliy darajadagi Strategik hamkorlik kengashining bo‘lajak navbatdagi yig‘ilishi va Turkiy davlatlar tashkilotining rejadagi sammitiga tayyorgarlik ko‘rishga alohida e’tibor qaratilgan.

O‘zbekistonda bo‘lajak Hukumatlararo komissiya yig‘ilishi va qo‘shma biznes forumini, shuningdek, Turkiya Buyuk millat majlisi delegatsiyasining Parlamentlararo ittifoq Assambleyasining 150-sessiyasida ishtirok etish uchun tashrifini samarali o‘tkazish muhimligi qayd etilgan.

Davlat rahbarlari xalqaro ahamiyatga molik dolzarb masalalar yuzasidan ham fikr almashgan.

Eslatib o‘tamiz, oldinroq Prezident Shavkat Mirziyoyev nomiga xorijiy davlatlar va hukumatlar, nufuzli xalqaro va mintaqaviy tashkilotlar rahbarlari, taniqli din va jamoat arboblaridan qutlovlar kelayotgani xabar qilingandi.