Mirziyoyev Oydin Hojiyeva vafoti munosabati bilan hamdardlik bildirdi

north_east

O‘zbekiston xalq shoiri Oydin Hojiyeva vafot etdi

Prezident Shavkat Mirziyoyev O‘zbekiston xalq shoiri Oydin Hojiyeva vafoti munosabati bilan hamdardlik bildirdi. Bu haqda Prezident matbuot kotibi Sherzod Asadov xabar qildi.

Oydin Hojiyeva 1942 yil 22 aprelda Navoiy viloyati Qiziltepa tumanidagi Bo‘ston qishlog‘ida tug‘ilgan. Ushbu tumandagi o‘rta maktabni tugatganidan so‘ng Toshkent davlat universiteti (hozirgi O‘zbekiston Milliy universiteti)ning filologiya fakultetida tahsil olgan. U “Sharq yulduzi” jurnalida adabiy xodim, bo‘lim mudiri, keyinchalik “Gulxan” jurnalida bosh muharrir vazifasida xizmat qilgan.

Oydin Hojiyeva mashhur shoira Zulfiyaxonimning izdoshi sifatida O‘zbekiston xotin-qizlarining “Saodat” jurnalida samarali ishlab, ko‘p yillar unga bosh muharrirlik qilgan. 

Uning “Shabnam” deb nomlangan dastlabki  she’riy kitobi 1970 yilda nashr qilingan. O‘zining qariyb oltmish yillik ijodiy faoliyati davomida she’riyat va publitsistika janrlarida “Manzillar”, “Men sevgan qo‘shiq”, “Navo”, “Xushxabar”, “Mushfiq onajon”, “Chashmalarni izlayman”, “Tanlangan asarlar” nomli va boshqa o‘nlab asarlar yaratib, Vatanga muhabbat va sadoqat, onaga, ayol zotiga yuksak ehtirom, qadrdon zaminga beqiyos mehr kabi tuyg‘ularni o‘zbek shoiralariga xos yuksak nazokat va yoniq qalb bilan kuylab o‘tgan.

Uning asarlari dunyoning o‘nlab tillarida nashr etilgan.

O‘z navbatida Oydin Hojiyeva ko‘plab jahon va qardosh xalqlar adabiyoti yetuk namoyandalarining she’riy asarlarini o‘zbek tiliga tarjima qilgan.

O‘zbekiston Yozuvchilar uyushmasining faol a’zosi sifatida mamlakatda amalga oshirilayotgan ijtimoiy-iqtisodiy islohotlarning mazmun-mohiyatini aholi o‘rtasida keng targ‘ib etish, adabiy jarayonlarni yangi bosqichga ko‘tarish, yosh iste’dod egalari, ayniqsa, ijodkor qizlarni tarbiyalash borasida ham ibrat ko‘rsatgan.

Oydin Hojiyeva “O‘zbekiston xalq shoiri” faxriy unvoni, “El-yurt hurmati”, “Fidokorona xizmatlari uchun” ordenlari bilan mukofotlangan.

“Taniqli ijodkor, mehribon ustoz, samimiy va kamtarin inson Oydin Hojiyevaning xotirasi qalblarimizda hamisha saqlanib qoladi”, deyiladi xabarda.