Mirziyoyev Imomali Rahmon bilan ikki tomonlama uchrashuv o‘tkazdi

O‘zbekiston Respublikasi Prezidenti Shavkat Mirziyoyev bugun, 31 mart kuni Xo‘jand shahriga kelgach, Tojikiston Respublikasi Prezidenti Imomali Rahmon bilan uchrashuv o‘tkazdi. Bu haqda Prezident matbuot xizmati xabar berdi.

Bildirilishicha, oliy darajadagi kelishuvlarni amalga oshirish doirasida ikki tomonlama do‘stlik, strategik sheriklik va ittifoqchilik munosabatlarini yanada rivojlantirishning dolzarb masalalari muhokama qilindi.

Suhbat avvalida davlat rahbarlari muborak Ramazon hayiti bilan bir-birlarini va birodar xalqlarni samimiy tabrikladi. Shuningdek, O‘zbekiston bilan Tojikiston o‘rtasidagi ko‘p qirrali hamkorlik yuksak darajaga ko‘tarilgani katta mamnuniyat bilan qayd etildi.

Qayd etilishicha, 2024 yilda tovar ayirboshlash hajmi 700 million dollardan oshdi. Sanoat, energetika, elektrotexnika, to‘qimachilik, qishloq xo‘jaligi va boshqa ustuvor sohalarda kooperatsiya loyihalari muvaffaqiyatli amalga oshirilmoqda. Samarali hududlararo aloqalar va faol madaniy-gumanitar almashinuv yo‘lga qo‘yilgan.

Hukumatlararo komissiyaning bo‘lajak yig‘ilishida amaliy hamkorlik bo‘yicha qo‘shma loyihalarni tezlashtirish choralari ishlab chiqilishi muhim ekani ta’kidlandi.

Yetakchilar mintaqaviy kun tartibi, shu jumladan O‘zbekistonda o‘tkaziladigan ko‘p tomonlama sammitlar yuzasidan ham fikr almashdi.

Ma’lumot uchun, bugun, 31 mart kuni O‘zbekiston, Tojikiston va Qirg‘iziston davlat chegaralarining tutash nuqtasi to‘g‘risidagi shartnomani imzolash rejalashtirilgan. Prezidentlar san’at ustalari ishtirokidagi qo‘shma konsertda ham ishtirok etadi.