Mirziyoyev Dubay valiahdi bilan uchrashdi

Bugun, 27 sentyabr kuni O‘zbekiston Respublikasi Prezidenti Shavkat Mirziyoyev Birlashgan Arab Amirliklari Bosh vaziri o‘rinbosari, Mudofaa vaziri, Dubay Amirligi valiahdi Shayx Hamdan bin Muhammad Ol Maktum boshchiligidagi delegatsiya bilan uchrashdi. Bu haqda Prezident matbuot xizmati xabar berdi.

Uchrashuvda ko‘p qirrali sheriklikni yanada rivojlantirish, iqtisodiy va investitsiyaviy loyihalarni ilgari surish, mudofaa sohasida amaliy hamkorlikni yo‘lga qo‘yish masalalari ko‘rib chiqildi.

BAA delegatsiyasi tarkibida uchrashuvda Hukumat ishlari vaziri Muhammad bin Abdulloh al-Gergaviy, Energetika va infratuzilma vaziri Suhayl bin Muhammad al-Mazruiy, Iqtisodiyot vaziri Abdulloh bin Tuk al-Marriy, Sun’iy intellekt masalalari va raqamli iqtisodiyot bo‘yicha davlat vaziri Umar bin Sulton al-Olama ham qatnashdi.

Suhbat avvalida Shayx Hamdan Ol Maktum O‘zbekiston Prezidentiga samimiy qabul uchun minnatdorlik bildirib, BAA Prezidenti Shayx Muhammad Ol Nahayon va mamlakat Bosh vaziri, Dubay Amiri Shayx Muhammad Ol Maktumning samimiy salomini yetkazdi.

Uchrashuvda investitsiyalar, innovatsion rivojlanish, "yashil" energetika, infratuzilma, ta’lim, sog‘liqni saqlash, ekologiya, raqamli transformatsiya, turizm va boshqa muhim yo‘nalishlarda o‘zaro manfaatli hamkorlikning yangi uzoq muddatli kun tartibini shakllantirish masalalariga alohida e’tibor qaratildi.

"Bugun kunning birinchi yarmida o‘tkazilgan o‘zaro manfaatli hamkorlik salohiyatini ro‘yobga chiqarish bo‘yicha qo‘shma forum hamda ikki tomonlama hukumatlararo va idoralararo muzokaralarning samarali yakunlari yuksak baholandi.

Strategik tarmoqlarda keng ko‘lamli hamkorlikni rivojlantirish bo‘yicha "yo‘l xaritasi"ni qabul qilishga kelishib olindi", deyiladi xabarda.

Ta’kidlash joizki, BAA O‘zbekistonning Osiyo mintaqasidagi asosiy hamkorlaridan biridir. Oxirgi oliy darajadagi muloqotlar o‘tgan yil dekabr oyida Dubay shahrida bo‘lib o‘tgan Global iqlim sammiti doirasida bo‘lib o‘tgan edi.

Tovar ayirboshlash 2023 yilda 21 foizga o‘sib, 626 million dollarni tashkil etdi. O‘zbekistonda Amirliklar kapitali ishtirokida 320 dan ortiq korxona faoliyat ko‘rsatmoqda. Amalga oshirilayotgan va istiqbolli investitsiya loyihalari portfeli qariyb 20 milliard dollarni tashkil etadi.

Eslatib o‘tamiz, oldinroq Prezident yordamchisi Saida Mirziyoyeva ham Shayx Hamdan bin Muhammad bin Rashid Ol Maktum bilan uchrashgandi. Muloqot davomida turli sohalardagi ikki tomonlama hamkorlik masalalarining keng doirasi, shuningdek, ustuvor yo‘nalishlarda qo‘shma dastur va loyihalarni amalga oshirish istiqbollari muhokama qilindi