Mirziyoyev bosim ostida egiladigan siyosatchi emas – Safoyev YeOIIga qo‘shilish haqida

Shu kunlarda O‘zbekistonning YeOIIga qo‘shilishi bilan bog‘liq gap-so‘zlar, taxmin va ehtimollar kuni tartibida turibdi. Oliy Majlis Senati raisining birinchi o‘rinbosari Sodiq Safoyev Rossiya Federatsiyasi Federatsiya kengashi delegatsiyasining O‘zbekistonga tashrifi yuzasidan o‘tgan matbuot anjumanida O‘zbekistonning YeOIIga qo‘shilish masalasi bo‘yicha aniq qaror qabul qilinmaganini ma’lum qildi. Bu haqda Sputnik yozmoqda. 

Safoyevning so‘zlariga ko‘ra, Valentina Matviyenkoning Yevroosiyo iqtisodiy ittifoqqa qo‘shilish haqidagi bayonoti haddan tashqari rezonansga ega emas. Chunki shunday rejalar so‘nggi uch yil davomida muhokama qilingan, ammo yakuniy qaror qabul qilish uchun har tomonlama puxta tahlilni talab qiladi.

“Bu haqda Prezidentning o‘zi parlament oldida gapirgan, bundan tashqari, avgust oyida Belarusda bitim imzolangan. U yerda, shu qatorda, Belarusning YeOIIdagi tajribasini inobatga olgan holda hamkorlik masalalarini ko‘rib chiqish to‘g‘risida band bor edi. Bu mavzu yangi emas. Ekspert guruhlari ishlamoqda, masalani o‘rganishmoqda. Barcha ijobiy va salbiy tomonlar taqqoslanishi bilan qarorni e’lon qilamiz.

O‘zbekistonning qabul qilinishi yoki qabul qilinmasligi, agar O‘zbekiston qaror qabul qilsa va shunga murojaat qiladigan bo‘lsa, har bir davlatning konsensus – har bittasi shunga rozi bo‘lishi kerak. Shuning uchun biz ular bilan muzokaralar olib borishimiz, ishchi guruhi tuzishimiz kerak”,  deydi Safoyev.

Senat raisining birinchi o‘rinbosari ittifoqqa qo‘shilish masalasida bosim o‘tkazilishi ehtimoli mumkinligi haqidagi savolga javob berarkan quyidagilarni ta’kidladi:

“O‘zbekiston – unga bosim o‘tkazish mumkin bo‘lgan davlat emas, Prezidentimiz bosim ostida egiladigan siyosatchi emas. Va buni hamma juda yaxshi biladi. Shunday ekan, hech qanday bosim haqida gap-so‘z bo‘lishi mumkin emas. YeOII a’zo davlat vakillaridan savollar bo‘ldi, turli fikrlar bildirildi. Muzokaralar ketyapti – ikki tomon manfaatlari haqida. Bu yerda oddiy diplomatik jarayon ketyapti”.

Safoyevning ta’kidlashicha, O‘zbekiston har qanday tashkilotga a’zo bo‘lishda faqat o‘z manfaatlaridan kelib chiqib qaror qabul qiladi.

“Bizda uch yildan beri ochiq tashqi siyosat olib borilyapti. Biz 25 yil davomida qo‘rqqan, qochgan – Turkiy kengashga qo‘shildik, endi Yevropa Ittifoqi bilan Yevropa bozorlariga chiqish uchun kengaytirilgan hamkorlik to‘g‘risida kelishuvni muhokama qilmoqdamiz. Biz YeOIIga qaraganda, ko‘proq rivojlangan platformalar mavjudligini tushunamiz. Masalan, Yevropa ittifoqi. Ammo bu uyushma doirasida davlatlar o‘z mustaqilligining bir qismini – moliyaviy, qonunchilik, sud sohalarida yo‘qotadilar, chegaralar bo‘yicha ham imtiyozlar mavjud va hokazo. Yevroosiyo iqtisodiy ittifoqi buni nazarda tutmaydi. Shuning uchun, qaror qabul qilganimizda, birinchi navbatda ushbu tomonlarga e’tibor qaratamiz”, deb xulosa qildi Safoyev.