Mirziyoyev BAA bilan “quruq” portlar barpo etishga kelishdi

O‘zbekiston Respublikasi Prezidenti Shavkat Mirziyoyev bugun, 14 yanvar kuni Abu-Dabi shahriga tashrifi doirasida "quruq" portlar barpo etish bo‘yicha kelishuvga erishdi. Bu haqda Prezident matbuot xizmati xabar berdi.

Qayd etilishicha, Shavkat Mirziyoyev Birlashgan Arab Amirliklari investitsiyalar vaziri, “ADQ” xoldingi bosh ijrochi direktori Muhammad Hasan al-Suvaydiy boshchiligidagi ushbu mamlakat yetakchi kompaniyalari delegatsiyasi bilan uchrashuv o‘tkazgan. Uchrashuvda “AD Ports Group” kompaniyasi rahbari Muhammad Juma al-Shamisiy, “Tadweer” rahbari Ali al-Daheriy, “Plenary Group” rahbari Mustafo Faxur va “DUCAB” rahbari Muhammad Abdulrahmon al-Mutava ishtirok etgan.

“Ushbu kompaniyalar o‘z sohalarida jahon yetakchilaridan biri bo‘lib, ularning jami aktivlari 200 milliard dollardan ziyodni tashkil etadi”, deyiladi xabarda.

Uchrashuvda yuqori texnologik tarmoqlarda amaliy hamkorlikni rivojlantirish va investitsiya portfelini kengaytirish imkoniyatlari ko‘rib chiqildi. Shuningdek, BAA bilan iqtisodiyotning turli yo‘nalishlarida sheriklik jadal rivojlanib borayotgani katta mamnuniyat bilan qayd etildi. Investitsiyalarni ilgari surish, sanoat va ilg‘or texnologiyalarni rivojlantirish bo‘yicha qo‘shma chora-tadbirlar amalga oshirilmoqda.

Bildirilishicha, har bir kompaniya bilan o‘zaro manfaatli hamkorlikni kengaytirish bo‘yicha navbatdagi qadamlar belgilandi. Infratuzilmani rivojlantirish, shaharsozlik, energetika, transport va logistika, tog‘-kon sanoati, elektrotexnika, kommunal xo‘jaligi va boshqa sohalarda qo‘shma loyihalar haqida so‘z yuritilgan. Innovatsion texnologiyalarni joriy etish, nodir metall konlarini o‘zlashtirish, mintaqaviy temir yo‘llarni rivojlantirish va "quruq" portlar barpo etish, kabel mahsulotlarini ishlab chiqarish loyihalarini jadallashtirish, ta’lim va tibbiyot sohalarida DXSH loyihalarini ilgari surish yuzasidan kelishuvlarga erishilgan.

Shuningdek, uchrashuv yakunida amaliy hamkorlikning barcha yo‘nalishlari bo‘yicha “yo‘l xaritasi”ni qabul qilishga kelishib olindi.

Eslatib o‘tamiz, avvalroq Prezident Shavkat Mirziyoyev bugun, 14 yanvar kuni Abu-Dabi shahriga tashrifning ishbilarmonlik tadbirlari doirasida Birlashgan Arab Amirliklari Sun’iy intellekt vaziri Umar bin Sulton al-Olama bilan uchrashuv o‘tkazgandi.