Mbappe allaqachon “Real” bilan shartnoma imzolagani ma’lum bo‘ldi

PSJ hujumchisi Kilian Mbappening “Real Madrid”ga o‘tishi deyarli hal qilindi.

Jurnalist-insayder Janluka Di Marsioning yozishicha, fransiyalik futbolchining allaqachon Madrid klubi bilan shartnomasi mavjud va qishki transferlar oynasi yopilguniga qadar uni imzolashi mumkin.

Qayd etilishicha, Kilian yakuniy qarorni qabul qilib bo‘lgan va katta syurprizgina uni fikridan qaytarishi mumkin. Mbappening parijliklar bilan tuzgan shartnomasi joriy mavsum oxirigacha amal qiladi. Shu tariqa, u erkin agent sifatida “Qirollik klubi” safiga kelib qo‘shiladi.

Eslatib o‘tamiz, 22 yoshli Kilian Mbappe uchun “Barselona” 90 million yevrolik shartnoma bonusini taklif qilmoqchi ekani haqida xabar bergan edik. Kataloniya klubi yozgi transfer oynasi ochilguniga qadar moliyaviy holatini tiklab olishi mumkin.

Jamoa rahbarlarining fikricha, “Real” Kilian uchun imzo bonusi sifatida 50 million yevro taklif qilishi mumkin, xolos. Bundan tashqari, Madrid klubi unga 17 million yevrodan ko‘proq maosh to‘lay olmaydi. Kuman murabbiyligidagi jamoa esa Mbappega “qaymoqranglilar”dan ko‘ra, yuqoriroq maosh taklif qilmoqchi bo‘lgandi.