Maktablarda IT o‘quv soatlarini keskin ko‘paytirishni taklif qilyapmiz – XDP vakili

Bugungi kunda axborot texnologiyalari (IT) jamiyatimiz hayotining ajralmas qismiga aylangan. Ular nafaqat ishlab chiqarish va xizmat ko‘rsatish sohalarida, balki ta’lim tizimida ham muhim o‘rin egallab kelmoqda. Shu sababli ta’lim jarayonida IT fanlariga jiddiy e’tibor qaratish zamonaviy talablarga javob berishning asosiy shartlaridan biri hisoblanadi.

IT fanlarini puxta o‘rganish afzalliklari quyidagilarda namoyon bo‘ladi:

• birinchidan, bugungi raqamli iqtisodiyot sharoitida dasturlash, kiberxavfsizlik va sun’iy intellekt kabi sohalarda bilimga ega bo‘lish har qanday kasbda muvaffaqiyat qozonish uchun muhimdir;
• ikkinchidan, IT fanlari yoshlarning tanqidiy fikrlash va muammolarni hal qilish qobiliyatlarini rivojlantiradi, bu esa ularning har tomonlama rivojlanishiga va yetuk mutaxassis bo‘lib shakllanishiga xizmat qiladi.

Shu bois partiyamizning maktablarda IT yo‘nalishdagi o‘quv soatlarini keskin ko‘paytirish taklifi muhim ahamiyatga ega. Bu quyidagi imkoniyatlarni taqdim etadi:

Virtual laboratoriyalar o‘quvchi va talabalarga jismonan mavjud bo‘lmagan qurilmalar va dasturiy ta’minotlar bilan ishlash imkoniyatini beradi. Bu o‘quv jarayonini real vaqtda modellashtirish orqali o‘quvchilarning bilim va tasavvurini chuqurlashtiradi. 

Onlayn platformalar va elektron ta’lim (e-learning) orqali talabalar dunyo bo‘ylab yetakchi universitetlardan darslar olishlari mumkin. Bu platforma o‘quvchilarga o‘z mustaqilligini va o‘quv jarayonini boshqarish imkonini beradi.

Onlayn IDE (masalan, Replit, CodePen) talabalarga har qanday qurilmada kod yozish va ishlatish imkonini beradi. Bu talabalarni kod yozish jarayoniga tez jalb qiladi va ularga o‘zgartirishlarni darhol tekshirish imkonini beradi. 

Kooperativ o‘qitish va guruhda ishlash vositalari.  Tashkillashtirilgan guruhlarda ishlash talabalar o‘rtasidagi o‘zaro aloqani kuchaytiradi va ularni jamoaviy ishga tayyorlaydi. Onlayn hamkorlik vositalari (Google Docs, GitHub) esa talabalarga hamkorlikda ishlash imkonini beradi. 

Chatbotlar va sun’iy intellekt yordamchilari. Chatbotlar talabalarning savollariga javob berish va ularni o‘quv materiallariga yo‘naltirish uchun qo‘llanilishi mumkin. Bu vositalar interaktivlikni oshiradi va o‘quvchilarning ma’lumotlarga kirishini yengillashtiradi. 

Ijtimoiy media va bloglar. Ijtimoiy media platformalaridan talabalarni axborot texnologiyalari mavzularida munozaralarga jalb qilish va ularning bilimlarini yanada chuqurlashtirish uchun foydalaniladi.

Bugungi yangi avlodning dunyoqarashi va salohiyati ko‘p jihatdan ta’limda IT fanlariga qanchalik e’tibor berilishiga bog‘liqligiga shubha yo‘q, albatta. Ularni ta’lim jarayoniga yanada keng va chuqurroq joriy etish yoshlarning kelajakdagi muvaffaqiyati va mamlakatning innovatsion taraqqiyoti uchun asos yaratishga ko‘maklashadi.

Zulayho Akramova,
Oliy Majlis Qonunchilik palatasi deputati, O‘zXDP fraksiyasi a’zosi