Makronning raqibi qamoq jazosiga hukm qilindi

Fransiyaning Parij sudi mamlakatdagi o‘ta o‘ng “Milliy birlashuv” (sobiq “Milliy front”) partiyasi yetakchisi Marin Le Penni to‘rt yilga ozodlikdan mahrum etdi. Bu haqda BFMTV xabar berdi.

Parijning axloq tuzatish sudi Le Penni to‘rt yillik qamoq jazosiga hukm qilindi, shundan ikki yili shartli, qolgan ikki yil davomida u elektron bilaguzuk taqishi kerak bo‘ladi. Bundan tashqari, unga 5 yilga davlat lavozimlarida ishlash taqiqlandi. Oxirgi sanksiya sud qarori e’lon qilingandan so‘ng darhol kuchga kiradi, hatto Le Pen apellyatsiya arizasi topshirgan taqdirda ham. Shu tariqa siyosatchi 2027 yilgi saylovlarda prezidentlikka nomzodini qo‘ya olmaydi.

Parij sudi Marin Le Penni “Milliy birlashuv” partiyasi deputatlari yordamchilarini yollash orqali Yevroparlament mablag‘larini talon-toroj qilishda aybdor deb topgan.

U bilan bir qatorda “Milliy birlashuv” partiyasining yana sakkiz nafar a’zosi talon-toroj ishi bo‘yicha aybdor deb topilgan.

Yevropa Parlamenti mablag‘larini o‘g‘irlash ishi

2015 yilda Parij prokuraturasi Yevroparlamentdagi “Milliy front” (MF) vakillari 20 ga yaqin xodimni noto‘g‘ri yollaganlikda gumon qilib, tergov boshlagan edi. Prokuratura bu odamlar aslida MFda ishlashda davom etgan bo‘lsa-da, Yevroparlamentdan maosh olgani haqidagi ma’lumotni tasdiqladi.

2018 yilda Yevropa Ittifoqi Adliya sudi Jan-Mari Le Pen va uning sherigi Bryuno Golnish bilan bog‘liq shunga o‘xshash ish bo‘yicha qaror chiqargan edi. O‘shanda sud siyosatchilar Yevroparlamentga yuz minglab yevrolarni qaytarishi kerak degan qarorga kelgandi.

Ma’lumot uchun, Marin Le Pen 2022 yilda “Milliy birlik” partiyasidan prezidentlikka nomzod sifatida ko‘rsatilgan va saylovning ikkinchi turida mamlakatning amaldagi Prezidenti Emmanuel Makronga qarshi kurashgan. Saylov natijasiga ko‘ra esa Marin Le Pen 41,45 foiz ovoz to‘plab, mag‘lub bo‘lgan.

Eslatib o‘tamiz, avvalroq Parij prokuraturasi Marin Le Penni Yevroparlament mablag‘larini noto‘g‘ri yo‘naltirganlikda ayblab, besh yillik qamoq jazosiga hukm qilishni so‘ragandi.