Макроннинг рақиби қамоқ жазосига ҳукм қилинди

Франциянинг Париж суди мамлакатдаги ўта ўнг “Миллий бирлашув” (собиқ “Миллий фронт”) партияси етакчиси Марин Ле Пенни тўрт йилга озодликдан маҳрум этди. Бу ҳақда BFMTV хабар берди.

Парижнинг ахлоқ тузатиш суди Ле Пенни тўрт йиллик қамоқ жазосига ҳукм қилинди, шундан икки йили шартли, қолган икки йил давомида у электрон билагузук тақиши керак бўлади. Бундан ташқари, унга 5 йилга давлат лавозимларида ишлаш тақиқланди. Охирги санкция суд қарори эълон қилингандан сўнг дарҳол кучга киради, ҳатто Ле Пен апелляция аризаси топширган тақдирда ҳам. Шу тариқа сиёсатчи 2027 йилги сайловларда президентликка номзодини қўя олмайди.

Париж суди Марин Ле Пенни “Миллий бирлашув” партияси депутатлари ёрдамчиларини ёллаш орқали Европарламент маблағларини талон-торож қилишда айбдор деб топган.

У билан бир қаторда “Миллий бирлашув” партиясининг яна саккиз нафар аъзоси талон-торож иши бўйича айбдор деб топилган.

Европа Парламенти маблағларини ўғирлаш иши

2015 йилда Париж прокуратураси Европарламентдаги “Миллий фронт” (МФ) вакиллари 20 га яқин ходимни нотўғри ёллаганликда гумон қилиб, тергов бошлаган эди. Прокуратура бу одамлар аслида МФда ишлашда давом этган бўлса-да, Европарламентдан маош олгани ҳақидаги маълумотни тасдиқлади.

2018 йилда Европа Иттифоқи Адлия суди Жан-Мари Ле Пен ва унинг шериги Брюно Гольниш билан боғлиқ шунга ўхшаш иш бўйича қарор чиқарган эди. Ўшанда суд сиёсатчилар Европарламентга юз минглаб евроларни қайтариши керак деган қарорга келганди.

Маълумот учун, Марин Ле Пен 2022 йилда “Миллий бирлик” партиясидан президентликка номзод сифатида кўрсатилган ва сайловнинг иккинчи турида мамлакатнинг амалдаги Президенти Эммануэль Макронга қарши курашган. Сайлов натижасига кўра эса Марин Ле Пен 41,45 фоиз овоз тўплаб, мағлуб бўлган.

Эслатиб ўтамиз, аввалроқ Париж прокуратураси Марин Ле Пенни Европарламент маблағларини нотўғри йўналтирганликда айблаб, беш йиллик қамоқ жазосига ҳукм қилишни сўраганди.