London Kiyevga Storm Shadow raketalaridan Rossiyaga qarshi foydalanishga ruxsat berdi

Buyuk Britaniya Ukrainaga Rossiya hududiga Storm Shadow raketalari bilan zarba berishga ruxsat berdi. Bu haqda "The Guardian" xabar berdi.

Nashrning hukumatdagi manbalarga tayanib yozishicha, qaror allaqachon qabul qilinganiga qaramay, 13 sentyabr kuni Buyuk Britaniya Bosh vaziri Kir Starmer va AQSH Prezidenti Jo Bayden o‘rtasidagi uchrashuv yakunida e’lon qilinishi kutilmayapti. 

"AQSH Davlat kotibi Entoni Blinken ham Vashington ATACMS raketalari bo‘yicha xuddi shunday qaror qabul qilganiga ishora qilgan.  Blinkenning so‘zlariga ko‘ra, Qo‘shma Shtatlar Ukrainadagi siyosatini jang maydonidagi vaziyatga qarab moslashtirishga tayyor va buni qilishda davom etadi", deb yozgan nashr.

OAVning qayd etishicha, agar Storm Shadow bo‘yicha ijobiy qaror qabul qilinmaganida, AQSH Davlat kotibi Entoni Blinken va Buyuk Britaniya Tashqi ishlar vaziri Devid Lemmining Kiyevga qo‘shma tashrifi amalga oshmay qolishi mumkin edi.

Kiyevdagi uzoq masofali raketalar haqidagi ommaviy bayonot haddan tashqari provokatsion deb baholanishi mumkin. Shoshilinch yoki keraksiz hujumlarning oldini olish uchun Ukrainaning 300 kilometrdan ortiq masofaga uchadigan raketalardan foydalanishi atrofida hali ham cheklovlar mavjud.

Jon Kirbining so‘zlariga ko‘ra, AQSH bu borada Ukraina bilan shaxsiy muzokaralarni davom ettirmoqda.

Eslatib o‘tamiz, avvalroq AQSH Davlat kotibi Entoni Blinken va Buyuk Britaniya Tashqi ishlar vaziri Devid Lemmi Kiyevga borgani xabar qilingandi.