Lavrov migrantlar rus tilini bilishi kerakligini yana eslatdi

Markaziy Osiyo, jumladan, O‘zbekistondan Rossiyaga borayotgan mehnat migrantlari rus tili va Rossiya qonunlarini bilishi kerak. Rossiya Tashqi ishlar vaziri Sergey Lavrov bugun, 23 aprel kuni  O‘zbekistonga tashrifi va Samarqandda respublika rahbariyati bilan muzokaralar yakunlari bo‘yicha o‘tkazilgan matbuot anjumanida ma’lum qildi.

“Vaziyatni global miqyosda olib boradigan bo‘lsak, albatta, mehnat muhojirlari sonining qisqarishiga olib keladigan choralar bizning manfaatlarimizga to‘g‘ri kelmaydi, chunki ishchi kuchi tanqisligi tegishli rejalarni kamroq reallashtirishi mumkin. Ammo muammoning ikkinchi qismi – Rossiya qonunlariga rioya qilish va mehnat muhojirlari orasida jinoiy tendensiyalarning rivojlanishining oldini olish zarurati. Va shunga o‘xshash holatlar mavjud”, dedi u.

Lavrovning aytishicha, Rossiya O‘zbekistonni qonunbuzarliklar uchun imkoniyatlarni, shuningdek, migrantlar o‘rtasida terrorizm va jinoyatchilik xavfini minimallashtirish “zarurligini to‘liq tushunadi”, deb hisoblaydi.

“Rossiya O‘zbekiston rahbariyati, shaxsan Shavkat Miromonovich Mirziyoyevning millatlararo totuvlikni saqlash va O‘zbekistonda millatlararo muloqot tili bo‘lgan rus tilining mavqeini, rus madaniy-tarixiy mavjudligini mustahkamlash borasidagi sa’y-harakatlarini izchil qo‘llab-quvvatlaydi. Mamlakatda millionga yaqin yurtdoshlarimiz istiqomat qiladi, qolgan O‘zbekiston fuqarolari esa u yoki bu tarzda kundalik hayotda rus tilida muloqot qiladi”, dedi Lavrov.

Rossiya TIV rahbarining so‘zlariga ko‘ra, uchrashuvlarda tomonlar madaniyat va ta’lim sohalaridagi hamkorlikni yuqori baholagan. U Rossiya oliy o‘quv yurtlarida 56 mingdan ortiq O‘zbekiston fuqarosi tahsil olayotganini, respublikada Rossiyaning yetakchi oliy o‘quv yurtlarining 14 ta filiali faoliyat yuritayotganini ta’kidladi.

“Shuningdek, O‘zbekiston faol ishtirok etayotgan Rus tili bo‘yicha xalqaro tashkilotni shakllantirishni imkon qadar tezroq yakunlash zarurligini ta’kidladik”, deya xulosa qildi Lavrov.

Eslatib o‘tamiz, Rossiya Tashqi ishlar vaziri Sergey Lavrov kecha, 22 aprel kuni O‘zbekistonga keldi. Sergey Lavrovni Samarqand xalqaro aeroportida O‘zbekiston Tashqi ishlar vaziri Baxtiyor Saidov kutib oldi. Bugun, 23 aprel kuni u Baxtiyor Saidov va O‘zbekiston Prezidenti Shavkat Mirziyoyev bilan uchrashdi. Lavrov O‘zbekiston rahbariyatiga Rossiyaning Ukraina inqirozini hal qilish uchun AQSH bilan aloqalari haqida axborot berganini aytdi.