Лавров мигрантлар рус тилини билиши кераклигини яна эслатди

Марказий Осиё, жумладан, Ўзбекистондан Россияга бораётган меҳнат мигрантлари рус тили ва Россия қонунларини билиши керак. Россия Ташқи ишлар вазири Сергей Лавров бугун, 23 апрель куни  Ўзбекистонга ташрифи ва Самарқандда республика раҳбарияти билан музокаралар якунлари бўйича ўтказилган матбуот анжуманида маълум қилди.

“Вазиятни глобал миқёсда олиб борадиган бўлсак, албатта, меҳнат муҳожирлари сонининг қисқаришига олиб келадиган чоралар бизнинг манфаатларимизга тўғри келмайди, чунки ишчи кучи танқислиги тегишли режаларни камроқ реаллаштириши мумкин. Аммо муаммонинг иккинчи қисми – Россия қонунларига риоя қилиш ва меҳнат муҳожирлари орасида жиноий тенденцияларнинг ривожланишининг олдини олиш зарурати. Ва шунга ўхшаш ҳолатлар мавжуд”, деди у.

Лавровнинг айтишича, Россия Ўзбекистонни қонунбузарликлар учун имкониятларни, шунингдек, мигрантлар ўртасида терроризм ва жиноятчилик хавфини минималлаштириш “зарурлигини тўлиқ тушунади”, деб ҳисоблайди.

“Россия Ўзбекистон раҳбарияти, шахсан Шавкат Миромонович Мирзиёевнинг миллатлараро тотувликни сақлаш ва Ўзбекистонда миллатлараро мулоқот тили бўлган рус тилининг мавқеини, рус маданий-тарихий мавжудлигини мустаҳкамлаш борасидаги саъй-ҳаракатларини изчил қўллаб-қувватлайди. Мамлакатда миллионга яқин юртдошларимиз истиқомат қилади, қолган Ўзбекистон фуқаролари эса у ёки бу тарзда кундалик ҳаётда рус тилида мулоқот қилади”, деди Лавров.

Россия ТИВ раҳбарининг сўзларига кўра, учрашувларда томонлар маданият ва таълим соҳаларидаги ҳамкорликни юқори баҳолаган. У Россия олий ўқув юртларида 56 мингдан ортиқ Ўзбекистон фуқароси таҳсил олаётганини, республикада Россиянинг етакчи олий ўқув юртларининг 14 та филиали фаолият юритаётганини таъкидлади.

“Шунингдек, Ўзбекистон фаол иштирок этаётган Рус тили бўйича халқаро ташкилотни шакллантиришни имкон қадар тезроқ якунлаш зарурлигини таъкидладик”, дея хулоса қилди Лавров.

Эслатиб ўтамиз, Россия Ташқи ишлар вазири Сергей Лавров кеча, 22 апрель куни Ўзбекистонга келди. Сергей Лавровни Самарқанд халқаро аэропортида Ўзбекистон Ташқи ишлар вазири Бахтиёр Саидов кутиб олди. Бугун, 23 апрель куни у Бахтиёр Саидов ва Ўзбекистон Президенти Шавкат Мирзиёев билан учрашди. Лавров Ўзбекистон раҳбариятига Россиянинг Украина инқирозини ҳал қилиш учун АҚШ билан алоқалари ҳақида ахборот берганини айтди.