Buxoroda ham koronavirusga chalingan 4 bemor sog‘ayib ketdi

O‘zbekistonda koronavirus infeksiyasiga chalingan bemorlarni samarali davolash borasida minglab tibbiyot xodimlari matonat bilan mehnat qilishmoqda. Natijada, poytaxtdagi Virusologiya ilmiy-tekshirish instituti klinikasidan tashqari, Xorazm va Namangan viloyatlari yuqumli kasalliklar shifoxonasida ham koronavirus infeksiyasiga chalingan bemorlarning butunlay sog‘ayishiga erishilmoqda.

Sog‘liqni saqlash vazirligi bergan ma’lumotga ko‘ra, endilikda ularning safiga Buxoro viloyati yuqumli kasalliklar shifoxonasi ham qo‘shildi. Ushbu tibbiyot muassasasining fidoyi va jonkuyar shifokorlari sa’y-harakati o‘zining dastlabki samarasini berib, 4 nafar bemor butunlay sog‘ayishdi. Ular viloyat sog‘liqni saqlash boshqarmasi mas’ullari ishtirokida reabilitatsiyaga kuzatildi. O‘zbekistonda koronavirusdan forig‘ bo‘lgan 65 nafarga yetdi.

Tuzalganlarning ikki nafari (biri Andijondan, yana biri esa Toshkent viloyatidan) Turkiyadan Buxoroga kelgan bo‘lib, joriy yil 26 mart kuni koronavirus infeksiyasi aniqlangan edi. Yana farg‘onalik ikki nafar fuqaro esa charter reys orqali Rossiyadan Buxoroga kelishgach, ularda ham koronavirus infeksiyasi tasdiqlangandi.

Ayni paytda viloyat yuqumli kasalliklar shifoxonasida koronavirus infeksiyasiga chalingan bemorlarga tibbiyot xodimlari tomonidan xalqaro stantdartlar asosida muolajalar olib borilmoqda. Bunda, poytaxtdagi malakali shifokorlar, shuningdek,  mamlakatning pulmonolog, kardiolog, terapevt, endokrinolog kabi yetuk mutaxassislari bilan telemuloqot o‘rnatilib, zarur tavsiyalarni olishayotgani ham qo‘l kelmoqda.

Eslatib o‘tamiz, O‘zbekistonda koronavirusni yuqtirib olish bilan bog‘liq ilk holat joriy yilning 15 mart kuni qayd etilgan edi. Ayni vaqtga kelib, koronavirusga chalinganlar 833 nafarga yetdi. Bugungacha kasallanganlarning 4 nafari vafot etgan.

Qadrli yurtdoshlar, karantin davrida zarurat bo‘lmasa, ko‘chaga chiqmang. Vaqtni oilangiz, farzandlaringiz davrasida o‘tkazing. Unutmang, #UydaHayotBor